close
¿De qué falen cuando falen de «diálogu»?

¿De qué falen cuando falen de «diálogu»?

2019-10-23143Visitas

Quiciás la pallabra más repitida nestos tiempos, polo menos no referente al tema de Cataluña, seya esa de «diálogu». Ye una pallabra recurrente, toos la empleguen y podría paecer que según eso, nun habría dificultá en llegar a alcuerdos. N’efeutu, el Gobiernu y el Parllament catalán piden al Gobiernu d’España diálogu. El grupu de Podemos y los arreyaos a él tamién piden, en primer llugar diálogu ente les parte y a Pablo Iglesias paez-y inconcebible que’l Presidente en funciones vaya a Barcelona y nun dialogue con Torra. L’alcaldesa de Barcelona y la coalición que llidera pidi tamién lo mesmo. Ya inclusive los partíos catalanes non independientistes piden que primero Torra dialogue con ellos. Ye curioso, entós, qu’esi diálogu non se produza, y un (o sea yo) piensa qu’igual ye que nun tamos emplegando bien la pallabra. Porque un (o sea yo) cree que cuando se dialoga con otru sobre un tema ye pa espone-y la propia opinión sobre esi tema, pero tamién pa escuchar lo que tien de dicir l’oponente sobre lo mesmo. Y si se quier llegar a dalgún alcuerdu (si nun se quier llegar nun debemos pidir diálogu) pues dambes partes tendrán que ceder en dalgo de los sos planteamientos.

Lo que dende llueu nun ye dialogar ye pretender que l’otru aceute al cien por cien les mios peticiones, porque eso nun ye diálogu sinón imposición. Poro, lo primero qu’había d’entruga-yos a los independentistes catalanes ye si tán dispuestos a rebaxar lo de la independencia, o eso ye dalgo que nun se discute. Porque si eso ye indiscutible, si eso nun tien rebaxa dalguna, sobra’l diálogu y la so petición. Podría haber (digo como hipótesis) pasos alantre poles dos partes. Igual pequeños, pero que supondríen un avance. Nun sé, meyorar l’Estatut con más competencies, con que se mencione la pallabra «nación», que se faiga una comisión pa una posible reforma constitucional… Coses que seyan a aceutase por dambes partes.  Pero, claro, si’l diálogu ye namás pa ver cómo organizamos la separación d’España eso nun tien futuru. Y, abúltame qu’esi ye’l «diálogu» que quieren el señor Torra y los suyos. Y como tol mundu sabe qu’esi yel dialógu que se quier, paezme que ye un cinismu grande siguir pidiéndolu un y otru día, porque, o se ye mui cínicu o se ye un ilusu. Y nun se cuál de les dos coses ye peor.