Que l’estamentu xurídicu ye’l peor valoráu de tolos qu’hai n’España, ye daqué evidente. Namás fai falta lleer les encuestes que dacuando se realicen, pa ver cómo los xueces van a la cola na estimación de la xente, inclusive detrás de los políticos, que yá ye dicir. Y ye que toos tenemos dalguna esperiencia, propia o conocida, d’actitúes de miembros de la xudicatura que son verdaderes barbaridaes o erros qu’arrecostinen graves perxuicios pa la xente común de la cai. Yo, claro, tengo la mía, nun pleitu col bancu nel que trabayé abondos años, al que-y dieron la razón nun tema de perres que constituyó una inxusticia manifiesta.
Nos últimos tiempos, esta valoración negativa ta afondando de tal mou ente la xente, que nun vien de más citar la famosa frase d’Ortega y Gasset respeuto d’aquella monarquía «moribunda»: Delenda est monarquía. Les corrupteles, navayazos, axustes de cuentes y envidies del casu escontra’l xuez Garzón, fieden hasta más allá de Dinamarca. Y nun ye que yo seya «garzonista», pues avecen a cayeme mal les persones que van d’estrelles mediátiques, pero los sos propios collacios de profesión tienen-y tantu odiu que nun tengo más remediu que poneme del so llau. Amás que’l solu fechu de tener visto al asesín y dictador Pinochet deteníu na so residencia de Llondres, valióme pa da-y un ampliu marxen d’error, suponiendo que lu hubiere.
¿Y qué dicir del «casu asturianu», o del «casu del asturianu»? L’empecinamientu y el despreciu del señor xuez Miguel Angel Carbajo Domingo raya (voi quedar ehí) na prevaricación, o seya, en dictar una sentencia a sabiendes que ye inxusta, sinón nun tien otra desplicación. Y paezme que yá va llegando’l momentu de principiar a guardar toos estos nomes en dalgún sitiu, anque seya na memoria. Nomes como’l d’esti xuez que fai un dañu oxetivu al pueblu asturianu, aprovechándose d’una plataforma d’inmunidá que-y da la so profesión y, dende ella, amás, a reñir. ¿Qué pensaríemos d’un militar, al que’l pueblu-y da les armes pa que lu defenda, y les utilizare escontra’l propiu pueblu? Pues que yera un traidor ¿non? A un xuez, la sociedá-y da la capacidá de xulgar y decidir nos pleitos pa defender al ciudadanu, non pa lo contrario. ¿Cómo podemos llamar a un xuez que, desoyendo la opinión cuasi unánime del tribunal que garantiza los nuestros derechos constitucionales, fai oyíos sordos y falla escontra’l ciudadanu desarmáu? Habría que-y buscar un nome apropiáu.
Y ye verda. Hai que principiar a memorizar toos estos nomes que, de baldre, empleguen la so posición (política, 
económica, xudicial…) pa dir escontra’l pueblu. Y lo menos que podemos, ye face-yos un vacíu social. Si los conocemos, procurar tratalos como ellos faen con nosotros, col despreciu que merecen. Yo propondría qu’ a ésti Miguel Angel Carbajo Domingo, cuando fuere a mercar el pan-y lu dieren del día anterior. Si va a tomar sidra a un chigre, que’l dueñu-y dea «puxarra» y l’echador éche-y unos culinos «kilométricos». El día que vaiga al cine, que’l taquilleru-y cuente’l final de la película. Si merca una camisa nueva, que-y dean una qu’encueya al llavala. Si va a una axencia de viaxes, que-y coloquen un d’esos billetes que queden atrapaos 24 hores nun aeropuertu. Y si en dalguna ocasión necesita un fontaneru, que-y inunden la casa. Yo, como lo mío ye escribir, prometo pa la prósima novela pone-y al «malu» de la historia’l so nome. Y, amás, como-y tien tantu odiu, voi a pone-ylu n’asturianu. O seya, que’l mio prósimu «malváu» va a llamase Miguel Ánxel Carbayu Domingu. Ya verá lo que ye bono. Y agora que lo pienso: el mio amigu Carballeira escribió va tiempu un simpáticu cuentu que llevaba por títulu: «Un carbayu cocoteru». ¡Coime, agora yá sé por quién diba la cosa! ¡Qué h.odío Carballeira, cómo lo vía venir…!
