La verdá, tarrecía meteme a analizar los resultaos autonómicos asturianos depués d’un tiempu qu’abulta una eternidá. Les coses en política van tan rápides, entaínen tanto, que cualquier análisis queda vieyu y obsoletu en cuatro díes. Pero, bueno, como yá punxe un títulu asemeyáu siguíu d’un «I», pues dalgo tendré que dicir pa poder poner el «II».
Lo primero, que munchos asturianistes ayudaron a engordar les cifres del señor Barbón arriendes de les sos promeses d’oficializar la llingua. Seguro qu’otros, por otros motivos, tamién. Pero nun hai que desdexar esi votu asturianista a un partíu que se moyó bastante na defensa teórica de la oficialidá de la llingua. Que yo sepa, hasta agora, los ganadores (por goleada) nun dixeron un res sobre l’asuntu. Ye verdá qu’ello nun depende sólo del PSOE, pero cola posición de privilexu qu’algamaron, bien podíen encabezar una campaña empobinada a esi menester. Yo yá dixi n’otros foros, antes de les eleiciones, que nun me gustaba nada lo que los socialistes dicíen (o dexaben de dicir) al rodiu de la nuestra llingua. Como ya llueve sobre la repla, dame la impresión que los supuestos enfotos llingüísticos socialistes van quedar en papel moyao. Dalgo paecío a: «¡Salvamos, falta un diputáu pa conseguilo!» Y que me perdonen si nun ye asina.
De los otros partíos, el PP caltuvo una cierta dignidá, tal y como pintaron les coses nes Xenerales. Y eso que teníen al enemigu en casa: la eterna perdedora Mercedines Fernández, ellí apalancada, soltando velenu a tolo que se mueve que nun mueva ella. Ciudadanos xubió bastante, pero non lo suficiente pa desasitiar al PP, colo que m’abulta que quedaron un migayín frustraos. Vazquez, que nunca nun me gustó, nin como Rector, nin como políticu (polo que dixo en campaña) nun tien claro a quién sofitar. Presumía de socialdemócrata, pero los d’arriba manden muncho. A ver. Como taba previsto FORO pegóse’l chaplonazu. Un partíu creáu a la imaxen del so fundador, na que’l so fundador ta esapaecíu en combate, nun tien futuru. Nun perdió más porque la señora Moriyón tien un ñeru de votos xixoneses, de los que piensen (y yo tamién lo creo) que fizo un aceptable llabor como alcaldesa. Si hubiere repetío pa esi cargu igual los asuntos llocales fueren otros. Agora deberá dicidir si fai honor a esi supuestu «rexonalismu» con, por exemplu, una manina «a los del bable», o sigui en tierra de naide, caminando per un desiertu que nun lleva a nenguna parte. IX sigui perdiendo fuelle, nuna cuesta abaxo que nun lleva sinón al despeñaderu. Divisiones, facciones, rutina y apoyos poco esixentes, van esbayando a una coalición que debiere tener un sitiu na política nacional. Con Podemos pasa dalgo asemeyao. Suenen de risa les declaraciones de Pablo Iglesias, descargando les culpes nos grupos autonómicos, depués de ser ellos los que rellenaron munchos de los puestos de los representantes provinciales y llocales. O refunden, o se funden. Y pa finar, dame muncha pena qu’una parte non pequeña d’asturianos y asturianes dieren sofitu a un partíu (Vox) continuador de les «esencies» franquistes. Los que vivimos munchos años, demasiaos, nun réximen d’oprobiu y falta de democracia, nun somos a atalantar el sentíu d’esi votu. Con eso y con too, hai dalguna esperanza futura de reflexón política: nes eleiciones xenerales votaron por Vox un 11,49 d’asturianos (71.454). Nes autonómiques fízolo un 6,42 (33.784) Práuticamente la metada. A ver si la cosa sigui descendiendo, anque agora haya que los aguantar durante cuatro años. En fin, que quedé agotáu de tener que volver sobre esti tema que, como dixi al empiezu, ya ta periclitáu… anque entovía nun tengamos formáu gobiernu. ¡Lo que nos queda!
