Nel espaciu d’unos pocos díes dexaron esti mundu (eufemismu que siempre me prestó muncho, anque tamién pudiere referise a los astronautes) tres persones conocíes y d’estremaes valoraciones. La primera, por orde d’importancia patriótica fue don José Cosmen Adelaida, fundador y gran factótum de la empresa ALSA. Unes sigles que siempre identifiqué cola mio patria. Tuviere onde tuviere, si vía o viaxaba con un autocar que poníes eses sigles, paecíame que yá taba n’Asturies. Escribo esto dende Santander, frente a la Facultá de Filosofía, y toi viendo un par d’ALSAS recoyendo a los rapazos universitarios talo que si fueren pal Campus del Milán. Hai una práutica unanimidá en reconocer los abondos méritos, personales y empresariales, del fináu, y ye raro (anque cuando morremos toos somos bonos) esi xeneral apautamientu al rodiu de la so figura: xente de dreches, d’izquierdes, nacionalistes o españolistes, toos coinciden en valorar la so figura. Quiciás, y nun ye por ser repunante, habría que sentir tamién a otros dos sectores que, prudentemente, guarden silenciu. Los trabayadores que pasaron pela empresa, y los sos competidores, nun sólo nel ramu de la carretera, sinón tamién nel de los ferrocarriles y los aviones. En cualquier casu, ehí ta la so obra que, y nun ta de más dicilo, punxo a Asturies nel mapamundi.
Otru muertu ilustre fue’l xeneral Armada, que pudiendo pasar a la Historia (con mayúscules) como prudente conseyeru
real, fízolo como imprudente conseyeru d’un imprudente rei qu’anduvo xugando con fueu una temporadina enantes del 23-F. Y pal que quiera más datos remítolu al espléndidu llibru “Anatomía de un instante”, de Javier Cercas, onde desplica los enguedeyos de trayer y llevar al xeneral, escontra la voluntá de Suárez que lu tenía bastante “caláu”. El “nun ta nin se lu espera” nun ye del too cierto: dalgunos sí lu esperaben pa llanzase a la cai. Pero eso sí, agradeciéronse-y los “servicios prestaos”, ya sabemos a quién, con un indultu que lu sacó de la cárcel venti años enantes de cumplir la pena.
L’últimu muertu d’estos díes nun puedo dicir que fuere ilustre, nin siquier que me diere munches allegríes, porque trátase d’Emilio, el que fue defensa del Sporting allá pelos años sesenta del sieglu pasáu. Vi xugar a Emilio de defensa central col Club Calzada, enantes de la fusión col Pelayo de Xove pa facer el Xixón Industrial. Nun yera mui altu, pal puestu qu’ocupaba, pero tenía potencia, colocación y saltaba bien de cabeza. Los méritos algamaos ficiéronlu fichar pol Sporting. Tuvo la mala suerte de garralu nunes hores mui baxes, él nun yera nengún superclas y amás anduvieron poniéndolu en dellos puestos que nun-y diben, como de centrocampista. Fueron los años de vexetar per Segunda ya, inclusive, xugar la promoción pa Tercera. Yá se conoz la historia: xugóse una “liguilla” pola renuncia del Condal, y ganóla’l Sporting quedando pente medies la famosa “moneda” que nos dio’l pase a la final. Como bien dicía’l periodista “El Pilu”: “…y Ortiz tuvo la cara de pidir cruz…”. En fin, anque esti últimu desapaecíu nun llegare a ilustre, deséo-y, como a don Cosmen, que la tierra lu abellugue. Al conseyeru real que-y lo deseen otros.
