17 de Febreru 2017.– Güei el plenu taba dedicáu al tema del Maltratu Animal. El grupu d’Izquierda Xunida-Avanti Tutti Presto acudió vistíu de toreros pa concienciar a la opinión pública del maltratu a los toros. El toru que trayíen tuvieron que lu dexar a la entrada, previa protesta pola discriminación de xéneru (animal). El papel del toru fízolu un diputáu del grupu mixtu que s’ufiertó voluntariu. L’hemiciclu podía votar col deu p’arriba si-y perdonaben la vida al (vamos llamalu) «toru», y con él p’abaxo si lu había que pasaportar. El del grupu mixtu llibró por cuatro votos.
21 de Febreru 2017.– Plenu dedicáu a les subvenciones a la minería. El grupu socialista vieno vistíu de Mineros, coles lluces del cascu enceses. Con unes carretilles que teníen escondíes embaxo los escaños, soltaron metanes nel hemiciclu unos cuantos quilos de carbón que lo punxeron too perdío. Tratábase de concienciar a la opinión pública y al restu de señoríes de lo escoso d’unes subvenciones qu’acaben con una forma de vida secular. A la fin, hubo una protesta formal del Serviciu de Llimpieza del Congresu (SELLICO) porque tuvieron un trabayu extra non remuneráu. (Siempre tien qu’haber dalguién que proteste por too.)
23 de Febreru 2017.- Como na cai cellebrábase’l Día del Arguyu Gay, y pa tar en sintonía cola cai y colos nuevos tiempos parllamentarios, el grupu de Podemos acudió vistíu d’Arcu Iris y tirando serpentines y confetis a los escaños de la oposición (la oposición a ellos, claro). La carroza tuvieron que la dexar aparcada en doble fila, lo cuál orixinó grandes retenciones na Carrera de San Jerónimo. Paez ser que la multa municipal ta recurría. Manuela Carmena nun nos engañes más.
(Sigue na prósima sesión)
