1.- Diz el Rei que la bandera española ye’l meyor símbolu de la unidá. Asina ta la unidá.
2.- En Vox nun hai nada nuevo. Sicasí la desfachatez cola que lo muestren.
3.- Siempre llamé a Mercedines Fernández la eterna perdedora. Empérrase en siguir dándome la razón.
4.- N’España presumíase de que nun había un partíu d’estrema derecha como n’otros llaos. Partíu non lu había, pero estrema derecha sí.
5.- Si yo fuere independentista catalán desdexaríalo, non tanto por motivos éticos, cuanto estéticos: dan grima.
6.- Avisé va tiempu a la FSA que quiciás ésti fuere’l momentu afayaízu p’aprobar nel Parllamentín la oficialidá del asturianu. Abúltame que, tal y como tán les coses, esi momentu nun va a volver en munchos años.
7.- Atención feministes: hai que denunciar la llácara de les muyeres muertes o maltrataes. Pero tamién poner en valir los llogros d’otres muyeres que trunfen na sociedá. Por cierto ¿pa cuándo un Nobel de Lliteratura a una escritora?
8.- Pasaron unes absurdes Navidaes laiques. ¿Cuándo se darán cuenta qu’una cosa ye la relixón y otra les tradiciones?
9.- En Mayu eleiciones. Recuerdo una pintada que tuvo munchos años nel barriu L’Arena, ponía: «¿Y a quién votamos, gallu?» Pues eso, ¿a quién votamos, gallu?
10.- ¿Y qué dicen los de «los munchos bables» de que tengan que subtitular películes mexicanes? ¿Habrá tamién munchos castellanos?
