Siempres consideré imposible dicir cuál fue’l meyor xugador de fútbol de tolos tiempos. En primer llugar porque cada puestu tien les sos carauterístiques, le propies del mésmu, y nun pue comparase un gran defensa central con un gran delanteru centru. Lo que pasa ye que destaquen más fácilmente los que meten los goles, que los que los dan o los eviten, por eso tiéndese a poner en primer llugar a los grandes delanteros a la hora escoyer al meyor xugador de la historia: Pelé, Cruyf, Eusebio, Zarra, Maradona… Pero ye que, amás, nun puen comparase tampoco ente los del mesmu puestu si el tiempu trescurríu fue mui llargu. ¿Quién yera meyor Lángara o Villa? Imposible decidir, anque el “guah.e” seya’l másimu goliador de la seleición, y Lángara’l que más goles marcó por minutu xugáu.
Con estes premises, atrévome a dicir que don Alfredo Stefano Di Stefano fue “un de los más grandes” nel so puestu y “un de los más grandes” en xeneral. Y ye que, el xugador arxentinu del Real Madrid, fizo de mou individual aquello que se llamó “fútbol total”, o seya, que toos ataquen y toos defenden. Di Stefano arrancaba dende l’aria propia, conducía’l balón combinando colos compañeros y terminaba de másimu goliador de la Liga. Yera’l futbolista total: defendía y atacaba.
Ver xugar a Pelé yera un espectáculu: verticalidá, velocidá, remate cola cabeza o los pies… D’Eusebio, “la pantera”, yá falé n’otru comentariu. Cruyf tuvo un par d’años como’l más grande, col so xenial cambiu de ritmu y la forma d’esconder el balón. “Torpedo” Muller, tan pequeñu como peligrosu. Uwe Seeler, que marcaba goles con un porrón d’años encima. El primer Ronaldo. El “gordu” Puskas… Toos yeren fenómenos, pero don Alfredo yera’l más completu.
Vilu xugar, siendo yo mozu, n’El Molinón y dalguna vez en Buenavista, cuando entovía diba a los estadios a ver fútbol. La primer
vez que lu vi–creo que fue nel 1957- fue l’añu qu’ascendiéremos con Jesus Barrio d’entrenador. Teníemos cuasi’l mesmu equipu del ascensu, pero faltábanos el gran Ricardo, aquel delanteru cedíu pol Valencia que marcó cuarenta y tantos goles naquella temporada. Asina y too, ganamos al Real Madrid por 3-0 con dos goles del sensacional estremu Sánchez (un de penalti) y otru, dende’l mediu del campu con un chupinazu enorme de Biempica que’l porteru arxentinu Domínguez nin golió. Llovía, y el prau taba fechu un patatal onde s’enterraron los finos xugadores del Madrid. A Di Stefano nun se lu vio. Nin al francés Kopa, nin a Gento… Fue un de los partíos nos que más esfruté… pese a la “chupa” que garramos. Ganar a aquel equipu, el de les primeres cinco copes d’Europa, nun taba al algame de cualquiera.
D’aquella publicábense nos kioskos unos cuaderninos dedicaos a los deportistes de moda, con munches semeyes, cuntando la so vida. Nun había televisión. Los periodistes que los escribíen, avezaben a “bautizar” al protagonista con un apelativu, a mou de nomatu que lu definiere. Recuerdo al del estremu Gaínza, del At. Bilbao, que yera “el gamo de Dublín”. Gento, “la galerna del cantábrico”. El porteru Vicente, “el grapas”. Panizo, “el héroe de Jamor”… A Di Stefano bautizáronlu como “la saeta rubia”, porque, efeutivamente, diba direutu al gol como una saeta. Pero abúltame que nesti casu los periodistes quedaron cortos. L’astru arxentinu fue muncho más qu’una saeta, fue’l xugador más completu de tolos que pisaron un campu de fútbol. Y, como dicíamos de neños cuando retábemos a otros rivales, “mídome”. Agora, muerre con elli un de los grandes, un xugador irrepetible. Que la tierra-y seya leve al gran don Alfredo.
