close
Don Javier, el Tebanu

Don Javier, el Tebanu

2016-01-20Javier TebasSporting257Visitas

javier-tebas-fue-muy-duro-con-afe-1431074128691Tebas fue una importantísima ciudá-estáu n’antigua Grecia y famoses fueron les sos guerres con Esparta, unos cientos d’años enantes del nacimientu de Cristo -que tampoco se trata agora de tener que mirar la wikipedia. Pero esti otru Tebas, de nome don Javier, ye namás un pelamangos ensoberbecíu por un cargu qu’ocupa y que, pa llaceria nuestra, fáelu socialmente importante. Nun se trata d’un ministru, nin d’un rector d’universidá, nin del direutor d’un hospital, nin d’un famosu investigador. Non. Esti individuu de rostru petreu y pocos escrúpulos morales ye’l Presidente de la LFP, Liga de Fútbol Profesional -cuasi naide al aparatu- porque esi organismu ye, nestos momentos y pa siguir, más importante que la Unesco y cuasi tanto como’l Fondu Monetariu Internacional.

Un organismu, pero sobre too, un Presidente, emperráu en face-y la vida imposible a un modestu equipu como ye’l Sporting (modestu sólo nel presupuestu), con unes decisiones que si s’aplicaren col mesmu rigor a los equipos llamaos “grandes”, yá tuviere habido una revolución o dos y dende llueu, munches portaes de periódicos madrilanos o catalanes pidiendo  la so dimisión. Nun quita esto pa que’l Sporting, apuráu como tolos equipos d’economía modesta, metiere la pata retrasando unos pagos a la Facienda pública por falta d’efeutivu. Pero esos pagos yá tan fechos, pese a lo cuál, les sanciones que-y punxeren nel so día siguen entá vixentes. Nin siquier l’exemplu d’Irán, sancionáu nel so día polos americanos y agora perdonáu al cumplir les condiciones, val-y a esti dictador de perrona pa facer lo mesmo con un mínimu de grandeza d’espíritu. Quier facer escarmientu a costa d’acoyonar a un supuestu pequeñu.

Pero nun ye sólo eso. Ye que, otros munchos equipos que deben perres y que non les paguen (non como’l Sporting) tienen mayor llibertá pa fichar xugadores, anque seya empufándose. Y qué dicir d’exemplos como’l del Barcelona, que nun ye que se retrasare nos pagos a Facienda, ye que direutamente la estafó, manipulando les cifres del trespasu de Neymar, declarando una cantidá menor, y que por ello enfréntase a un delitu xudicial -como la Infanta- ensin que don Javier, el Tebanu, dixere esta boca ye mía. Anque sí que ye d’él.

Agora, como al perru flacu too-y son pulgues y nesto del pim-pam-pum nun ye más qu’empezar, fixa-y el partíuGuerreru tebanu escontra l’equipu defraudador del Barcelona un día de llabor a media tarde. O seya, qu’esa posibilidá de sacar unes poques perres que se da cuando un modestu s’enfrenta a un “poderosu”, más l’aspeutu deportivu de ver a les grandes figures de la Lliga n’El Molinón, nos los torga esi caradura mandamás d’un organismu inútil (¿cuántos años hubo fútbol ensin qu’esistiere la LFP?) pese a les protestes de los aficionaos que son los paganinis. ¿Por qué nun-y lo  fai al Real Madrid d”esi otru elementu de cuidáu que ye Florentino Pérez? ¿A qué nun s’atreve?

Antes, los guerreros tebanos diben a la guerra y a la muerte con honor. Los “tebanos” d’agora nun pasen de ser unos “abusones” escontra los más débiles. Ensin plizca d’honor, claro.