close
Ecos d’Asturies

Ecos d’Asturies

2015-06-18520Visitas

Anque pudiere paecelo, nun toi refiriéndome a nengún grupu folclóricu o corín de pueblu que tanto abunden pela xeografía asturiana. Falo de los ecos de les noticies del nuestru País, que me lleguen amatagaes y con retrasu al tar pasando unos díes nun pueblín de Castiella. Equí, nun sé por qué circunstancies esotériques, namás tenemos conexión a internet un poco tiempu a ultima hora del día, y los “guasaps” lleguen con tal retrasu que, si dalguién te diz que va a facer tal cosa, cuando tu lo llees ya la tien fecha y refecha.

Asina, y gracies a que pude entrar a mirar esi diariu benefactor que ye Asturies.com (dalgún día habrá de reconocese la función importante que faen tanto él, como Asturnews pal conocimientu de los asturianos), asina, digo, fui a enterame qu’un importante piñu de conceyales, dalgún alcalde y un númberu insospecháu de parllamentarios xuraron/prometieron el so cargu na llingua asturiana.

Nun ye ésti un tema menor, anque pudiere paecelo. Más bien da la impresión que, pasu ente pasu, y depués de munchu tiempu y munchu trabayu por parte de muncha xente (la repetición del “muncho” ye voluntaria) dalgo va calando, afondando, na sociedá asturiana. Asina, el fechu de que nun parllamentu nel que mui escasamente se sintiere falar n’asturianu, agora haya munches voces que lo faigan ye dalgo consolador y que nos alienda cara’l futuru.

Y ye curioso que, ente los partíos que propiciaron esta novedá, nun haya nengún que podamos nomar como “nacionalista”. Nin Podemos, nin Izquierda Xunida nin Foro, tienen esi calter, lo cuál da un nuevu xiru al tema. Porque dende que la coalición PAS-UNA sacó aquel primer diputáu nacionalista, pasando pol que consiguió más tarde’l PAS, hasta los del Bloque por Asturies que llegaron coalligaos con Izquierda Xunida, namás esos parllamentarios emplegaron cuando pudieron la nuestra llingua nos actos del Parllamentu Asturianu. Por eso digo qu’esta situación ye dafechamenta nueva y, abúltame, esperanzadora. Nun llegamos nosotros, pero’l nuestru mensaxe si lo fizo.

Asistí, tamién “en sordina”, a la intelixente maniobra que ficieron los fíos putativos de Podemos en Xixón y n’Uviéu y nun puedo tar más d’alcuerdo. En Xixón, el PSOE llocal, depués de tar tropecientos años nel poder municipal, terminó creyendo qu’aquello yera suyo. La soberbia, y les abondes metedures de pata na so xestión, ficieron el restu. Tán mui bien na oposición hasta que depuren un poco y cambien modos y maneres. Y yá nun val esi gritu que tanto dañu fizo a otros partíos, esi “¡qué vien la derecha!”, como únicu méritu políticu pa que los voten a ellos. La cosa yá nun ye tanto lo de dereches-izquierdes, como lo de árriba-abaxo, o vieyo-nuevo, y ellos tienen qu’aprender a tar colos d’abaxo y a rexenerase como un partíu nuevu.

El casu d’Uviéu ye distintu. Ellí onde gobernó tropecientos años fue’l PP, y la orden de Javier Fernández de dexalos siguir gobernando y nun pactar con Podemos fue suicida… o interesada. La rápida ya intelixente actuación de la lider d’esa formación, dándo-y l’alcaldía a una persona honrada y capaz, fue una amuesa de flexividá política y sentíu común. Eso de lo que tanto carecen los vieyos partíos políticos tradicionales.

Y hasta equí los mios ecos asturianos. Igual la distancia fai que se vean distintos. Esperare a la vuelta pa revisar el tema.