close
El caleidoscopiu de Sánchez Vicente

El caleidoscopiu de Sánchez Vicente

Siempre me prestaron los caleidoscopios. Ya sabéis, esa especie de catalexu que, en llugar de mirar pa lloñe, fáelo como pa dientro, como pa un mesmu. Y ellí, a poco que lu muevas, vas ver cristalinos de colores cambiar de formes, de posiciones, faciendo unes perguapes figures xeométriques. Siempre me prestaron los caleidoscopios, creo que yá lo dixi enantes. De pequeñu tuvi un mui guapu que llueu quedó arrumbáu na memoria de la historia. De la mía, claro. Na so alcordanza, rememorélu nuna novela xuvenil -“El diariu d’Enol”-en que’l padre del rapaz mérca-y un pal so cumpleaños. Llueu regalé-y un de verdá a una persona mui querida, que sé qu’entovía lu conserva.

Esti día, nel antiguu Institutu Xovellanos, que ye como tar en casa, presentóse la Poesía Completa de Xuan Xosé Sánchez Vicente embaxo’l títulu de “Propia Xera”. Nel llibru, de más de 500 páxines, recuéyese tola obra poética del autor xixonés dende los primeros poemes, allá pol añu de 1974 del sieglu pasáu (¡a qué impresiona!), hasta los caberos, escritos esti mesmu añu. Una obra que vista asina,  en xunto, merez el reconocimientu y el respetu del mundu lliterariu asturianu, y tamién del español, magar que l’asturianu  ye tamién una llingua española. Nel actu intervinieron, amás del propiu autor, l’editor de la obra, Antón García, que fizo un trabayu mui guapu d’edición, y puesta al día de los poemes y, amás, incluyó un interesantísimu Prólogu qu’escede la mera presentación formal pa camudase nun fondu estudiu de la obra poética de Sánchez Vicente.

Intervieno tamién el profesor de Lliteratura Medieval Leopoldo Sánchez Torre, al mio xuiciu un de los meyores críticos del nuestru País, que dio una verdadera “lleición maxistral” al rodiu de la poesía del escritor xixonés. De la so presentación ye de la que yo rescato’l términu  “caleidoscopiu”, aplicáu a la obra de Xuan Xosé: Una poesía caleidoscópica. Camiento yo que quería referise a la so variedá temática, llingüística, formal… Nel intre que “movamos” un poco’l llibru, los distintos cristalinos, los distintos poemes, cambien les sos formes, los sos colores, el dibuxu que representen, ufiertándonos una variedá de rexistros que lu diferencien del restu los poetes asturianos. Facéi la preba, veréis cómo ye verdá: poesía social, poesía amorosa, poesía de la memoria, poesía de la naturaleza, tornes… Versu llibre, rimes diverses, sonetos… Con esti llibru podría perfeutamente dase un cursu de lliteratura… y sobraríen páxines.

Llegó llueu’l turnu de los dos poetes mozos ellí representaos, Ignaciu Galán y Naomi Suárez, que ficieron una simpática rempuesta a la carta lliteraria escrita pol autor, va munchos años, dando conseyos a los futuros escritores mozos. Depués lleeron un par de guapos poemes. Y zarró l’actu Sánchez Vicente recitando una esbilla de poesíes, dalgunes a petición d’amigos, y poniendo la emoción nel salón d’actos. Y ye que la poesía, bien lleída en voz alta, nun tien comparanza. Total, una xornada na que se presentó un nuevu llibru, pero non un llibru más, sinón una obra mayor de la nuestra lliteratura y que, al tiempu, sirvió tamién como homenaxe públicu a un autor que ye un referente dientro d’ella. Y ye que, yá lo dixi al empiezu, ¡cómo me presten los caleidoscopios!

CIMAVILLA
Tantes vegaes te suañó la mar
vistiéndote d’espluma la cintura,
tantes vegaes te volvió a dexar,
que nun sabes si tienes la xuntura
pa cola tierra firme, o, si al tornar
acollinándote en foles de dulzura,
llevaránte les agües al so llar.
Mentantu’l to cantil arrechu espera
nortiando ensin vagar pal horizonte
la fola que te lleve gayolera
pa entregate la mano de consorte,
mira a Pandu y el Cotu, que, na tierra,
contigo allampen por facer la corte:
nun te vaigas quedar moza soltera,
desdexá pola mar y pola tierra.

“Propia Xera”
Xuan Xosé Sánchez Vicente
Editorial Saltadera