La coña que se trae’l Gobiernu del PP y la so Conseyera de Fomentu, cuyu nome nun cito pa nun face-y propaganda, col famosu tema de «la variante de Payares», ta llegando yá al altor de «vodevil». El vodevil ye, según l’ínclitu «María Moliner», un «género de comedia ligera y atrevida, en la que abundan las situaciones de enredo«. Xusto. Abúltame que nun hai meyor definición qu’esa pa lo del tema de la Variante (con mayúscules) Hai un poco de too: comedia, pal que lo vea dende fuera. Llixereza y atrevimientu, pa les socesives actuaciones nun sólo d’esti gobiernu, sinón tamién de tolos anteriores. Y situaciones d’enredu con unes declaraciones, nel Parllamentu y na prensa, que paecen la famosa másima de Groucho Marx: «Estos son los mios principios, si nun-y presten tengo otros».
Porque nun se cumplió nin un solu de los plazos. Unos plazos que fueron rectificándose sobre la marcha, nuna riestra d’improvisaciones que son exemplu de lo que nun se debe facer en política (nin en política, nin n’otra actividá) Pero con ser esto malo, l’incumplimientu de los plazos, lo peor ye la indefinición de lo que se quier facer. O ye que lo espliquen tan mal que yo polo menos nun m’entero. El tipu d’anchu de vía, la confluyencia o non de los tráficos, la utilización d’un o dos túneles… too ta nel aire. Y ta too nel aire porque hai un problema de basa que yá se conocía de mano, y del que nun ficieron nengún casu: La falta d’unos estudios xeolóxicos rigurosos.
Que la orografía d’Asturies ye abondamente complicada ye dalgo que siempre se supo. Cualisquier carretera, trazáu
ferroviariu o otru tipu d’obra pública que se quiera facer, tien de partir d’esi fechu. Asturies, tamién nesti casu, ye distinta. Y los estudios que se ficieron, o nun fueron los más afayaízos, o si lo fueron ye que nun se-yos fizo casu, de xuro por aforrar unes perres qu’agora habrán de gastase centuplicaes, si ye que quieren siguir col proyeutu. Toles mentires que se dixeron depués, nun faen más que enraxonar a los asturianos que vemos como, esa fecha de 2014 que daba la ministra del ramu pa poder utilizar la variante, va a quedar (yá quedó) desfasada dafechu. Entovía a estes altures, tamos esperando los resultaos d’un estudiu xeotécnicu qu’esclarie les midies de contención de la lladera de Campumanes, asina como de les filtraciones d’agua. Dicen que ye pa xunetu. Y de magar se tenga esto, écha-y un par d’añinos pa los trabayos qu’haya que facer. En fin, pa qué siguir. Poro, lo qu’hai que pidir dende Asturies ye, en primer llugar claridá, que se sepa lo que se quier facer y en qué plazos rigurosos. Y depués que se pongan los recursos necesarios pa facelo, porque ésta nun ye una obra nueva. Asturies lleva yá munchos años de retrasu respeutu al restu les otres comunidaes del Estáu, pa que vengan agora recateándonos unos recursos que yá teníen que tar aplicaos al sistema de comunicaciones asturianu. Los tiempos de pasar el Payares con mulos yá quedaron atrás. O polo menos eso debiere ser ¿non?
