Aprovecho’l títulu d’una película alemana de los años 30, pa dicir un par de coses al rodiu d’esi debate que se llama, abúltame que con poca fortuna, «L’estáu de la nación». Igual un nome más eufónicu (y más real) pudiere ser «L’estáu del Estáu», anque a la vista de lo que dicen unos y otros paez qu’habría que lu llamar «L’estáu de los Estaos», pues paez que los intervinientes falen d’Estaos distintos y distantes.
Nun voi dicir nada del conteníu del debate, porque yá la prensa, radio y televisión nos tienen un poco fartos con tantu analís, y caún, según la so ideoloxía o simpatíes personales, pue lleer lo que-y paeza más acordies colo qu’él piensa. Dime que prensa llees y te diré cuála ye la to ideoloxía. Sicasí, por dicir dalgo personal, a Rajoy nun se lu pue creyer, anque xure polos sos fíos, y Rubalcava, como dixo dalguién, «gana muncho cuando nun ta». Pero de lo que sí quixera falar, asina un poco al debalu, ye sobre’l «continente» del debate. El marcu nel que s’asoceden les distintes intervenciones de los diputaos:
Tolo qu’arrodia al señor o señora que fala dende l’estráu, ye d’un mal gustu que manca. Sos señoríes nun paren de falar en voz alta, de dicir chistes, eslóganes a coru, insultos, interrupciones, bromes perroneres… Sos señoríes, que cobren pol desendolcu del so llabor parllamentariu, una de cuyes obligaciones ye l’asistencia a los plenos, marchen de la sala en cuantes falen los dos «pexes gordos», dexando un desiertu como’l Sahara a los pies del probe interviniente «minoritariu». Da pena ver a dalgún representante de miles de ciudadanos españoles, falando pa media docena de aburríos personaxes. Sos señoríes, cuando queden na sala, nun escuchen lo que se ta diciendo por parte de cualquier representante que nun seya’l suyu: xuben y baxen peles escaleres, saluden a unos o otres, falen polos teléfonos móviles, o tán mirando les «tabletes», prefiero nun saber con qué conteníu. Mientres taba falando’l representante de I.X., Cayo Lara, que por cierto dio-y un palu soberanu al gobiernu de Rajoy, había «un puntu» afincáu na escalera de la izquierda, xubiendo y baxando, besando a muyeres y riéndose a voz en gritu. ¿Pero qué coño ye eso? Paez que se ta cellebrando un «botellón» parllamentariu. ¿Qué exemplu tán dando los caltenedores de la soberanía popular? Cualquier asamblea escolar se produz con muncha mayor educación qu’un plenu de tanta importancia como’l del Estáu de la Nación.
Nun momentu nel qu’España ta como ta, con tanta xente nel paru, colos desahucios, la corrupción, los espionaxes… el Parllamentu debería tar nun silenciu como si se tratre d’un veloriu, y sentir toos con respetu al que xuba al estráu a dar opiniones o soluciones, les que seyan, y nun paecer un «piteru» de xente que va ellí a divertise o a armar bronca. La verdá, nun me quedaron ganes de tar munchu tiempu delantre’l televisor. Cuando quiera ver cómo «El Congreso se divierte», voi al cine.
