close
El continente ta aislláu

El continente ta aislláu

2016-06-24BrexitEuropaInglaterra580Visitas

Gran BretañaBueno, pues cumplióse la que, al dicir de tolos sabios de Grecia que son munchos más de siete, yera la peor de les pesadielles europées: los ingleses (Gran Bretaña, yá sé) saliéronse de la llamada Unión Europea. Agora vendrán los análisis del acontecimientu. Les causes polítiques, económiques… Les consecuencies que too ello va a tener. Y esos más de siete sabios algamarán unes conclusiones que, al mio paecer, naide ta en disposición d’aldovinar nesti momentu. Ver, veremos, que dicen que dixo’l ciegu.

Un, que nun se tien por sabiu de Grecia, nin siquier por sabiu a seques, camienta que son munches y variaes les causes poles que se produxo el Brexit (hai que ver con qué facilidá nos apropiamos de los «pallabros» foriatos).Ye más, cuasi cualquier inglés (yá sé…) debe tener les suyes y non siempre compartíes por otros que votaron lo mésmo. Pero, con toles simplificaciones qu’esto conlleva, a min ocúrrenseme dos causes fonderes que paso a esponer: La primera ye la que da títulu a esti pequeñu comentariu, y que nun ye otra qu’esi carauter inglés aisllacionista, independiente, endogámicu, arguyosu o como diaños queramos llamalu. El chiste que lu define, más vieyu que la tos, vien recoyíu nesa noticia que daben los periódicos ingleses d’una gran tempestá nel Canal de la Mancha y que titulaben: «Tempestá nel Canal, el Continente ta aislláu». Nun yeren ellos los que taben aisllaos, yéremos el restu d’Europa. Sin embargu, el fechu ciertu ye que naide los obligó a entrar na Comunidá Europea, ficiéronlo ellos porque-yos dio pola gana, porque tal paez que los teníemos ellí obligaos. Que lo pensaren primero. Pero bueno, la verdá ye qu’ellos taben pero nun taben: Nesto sí, nel euru non, con pexiguerines y pañinos calientes, porque nun vaya a ser que perdamos la nuestra idiosincrasia y nos quiten el Té de les cinco.

Y la otra causa, al mio modestu talantar, ye que cuando los ingleses (etc.) entraron a formar parte de la ComunidáBandera europa Económica Europea, aquello yera un Club de Señores. Yeren los paises europeos fundadores: Francia, Bélxica, Italia, Luxemburgo, los Paises Baxos y Alemania, más los nuevos: Dinamarca, Irlanda y Reinu Xuníu. El Club de los Nueve. Ellí podía dise con bombín y monóculu y xugar al criquet. Pero, claro, lo d’agora ye otra cosa. Compartir sigles y espaciu con paises probes, como Rumania, Bulgaria, Grecia… eso ye demasiao. Sobre too, porque hai que compartir riqueza y … fronteres. Cualquier día preséntensenos a la hora del Té unos cuantos rumanos o búlgaros, y fastidiáronnos la dixestión. Hai un fondu de racismu, d’insolidaridá, de mieu a perder «lo nuestro» ensin nada a cambiu na decisión de salise d’esti Club, que ya dexó de ser de «señores».

En fin, si se quieren dir, que se vayan. Agora, que si llueu nun-yos van les coses bien, que nun traten de volver a picar a la puerta del restu d’Europa. Que sigan tocando el «Dios salve a la Reina», que nosotros siguiremos col «Himnu a l’allegría» del divinu sordu Beethoven. Tovía hai clases.