close
El desmantelamientu industrial de Xixón

El desmantelamientu industrial de Xixón

2009-07-021053Visitas

Al rodiu del cierre de la fábrica d’Albo, en Candás, un negociu afitáu yá nesa villa dende va munchu tiempu y que daba de comer a unes cuantes decenes de families candasines, petezme escribir güei del ensame de fábriques, empreses, tallerinos, etc. que, a lo llargo de munchu tiempu, formaron la cadarma industrial de Xixón. Un texíu que daba de comer a muncha xente y promovía gran riqueza pa la ciudá y p’Asturies. Voi referime, namás, a les empreses asitiaes na zona Natahoyo, La Calzada y carretera’l Musel, llugares pelos que yo pasaba davezu, unes veces andando y otres en tranvía. Y voi facelo sólo d’aquelles empreses medianes y grandes que daben trabayu a un númberu de xente importante.industries-xixon-desapaecies

L’Algodonera, que taba asitiada n’antigua carretera Avilés, agora Avda. L’Arxentina. Anguañu hai un grupu de viviendes d’Ensidesa y les llamaes Cases de l’Algodonera. Fabricaba colchones. La Harinera, que taba na cai Les Industries. Nel rodiu de la Cai Oriental taben: La Sombrerera, La Fábrica de baldoses Bachiller y Talleres Mecánicos La Calzada, onde agora ta l’Ambulatoriu de La Calzada. La Fábrica d’Aceites Casanova (conocida como L’aceitera) taba en Santa Olaya. Tamién no alto Santa Olaya taba la Fábrica de Cerveza «La Estrella de Gijón», onde hai unos edificios que se llamen «La Estrella». Nel Cortijo taba la importantísima Fábrica de Loza, que daba trabayu a muncha xente. De mayor importancia entovía, pola so producción de botelles y derivaos de vidru y los númberosos puestos de trabayu que xeneraba, taba Gijón Fabril. Agora hai un centru comercial y los Cines Yelmo. En Veriña taba l’Azucarera Asturiana y nel Natahoyo Industrial Alonso. Tirando pal Musel, n’Avenida Eduardo Castro (agora Príncipe d’Asturies) taba Metal Gráfica Moré, ente les cais Hondures y Guatemala. Tamién tuvo la Fábrica de Oxigeno. Un cachu enantes, na zona del Arbeyal, taba la Fábrica de Gaseoses «La Casera», que llegó a da-y nome a la playa del Arbeyal que, popularmente, empezó a llamase la playa de La Casera. Na Cai Hernán Cortés taba La Trefilería y tirando pa la Calzada Alta (güei Cerilleru) taba Cristasa, S.A.. onde agora ta’l Centru Municipal d’Empreses. Nel Camín de Rubín taba Cordelería Baras. Ensin escaecenos de Crady, que nos sos tiempos de puxu llegó tener cuasi mil trabayadores. Tirando hacia La Braña taba la importantísima Fábrica de Moreda, güei parque y pobláu, y mui xuntes la Fundición La Nueva y Talleres Unión. Pal llau de la Estación del Norte, La Bohemia Española

Xunto a toes estes empreses, dalgunes nun coincidieron nel tiempu, que daben un calter de gran ciudá industrial a Xixón, taben los astilleros. Yeren cinco, y los cinco importantes: 1)Astilleros del Cantábrico, nel entornu de la Playa del Natahoyo, güei rebautizada col nome de Poniente. Pellí cerca taben tamién la Fábrica de Yeso y la Sierra de Lantero, na zona que se llamaba del Parrochu. 2)Astilleros Duro Felguera (agora Naval Gijón) y al llau el Tallerón. 3) La Constructora Gijonesa. 4) Astilleros Riera, xunto a la Casa del Mar y Playa del Arbeyal, y 5) Marítima del Musel, onde taba la playa del Tallerín, llueu rellenada.

Gran parte d’esti esporpolle industrial provién del desarrollu del Puertu del Musel, convirtiéndose’l comerciu marítimu y la navegación, en motor, nun sólo de la industria, sinón tamién del nacimientu d’una burguesía comercial en Xixón que dio muncha vida a la ciudá. Hasta tal puntu tuvo importancia mercantil ya industrial, que nel añu 1884 instálase una Sucursal del Bancu España (onde agora ta La Biblioteca Xovellanos) y, poco tiempu depués, en 1899 créase’l Bancu Xixón con capital indianu.
Pero bono, nun se trata de cuntar la historia de la ciudá, sinón de referir cómo yera aquel Xixón industrial y comercial d’hai unos años, agora camudáu nuna ciudá de servicios, depués de les sucesives reconversiones. Y, por nun salir d’estos barrios fabriles a los que me refiero, nun falo d’otres grandes industries llocales como Uninsa, La Tabacalera, Ike, La mina La Camocha, etc. etc. tamién afectaes per eses reconversiones que tantu dañu nos ficieron. Por cierto, según el diccionariu de la Real Academia de la Lengua, Reconversión ye: «Procesu téunicu de modernización d’industries». ¿Ónde tuvo esa modernización de les industries? Equí lo qu’hubo fue un esterminiu d’industries. Un «asesinatu» del texíu industrial de Xixón, pa camudalo nuna actividá d’hostelería y turismu. Un turismu que nunca va a ser a rellenar el furacu que la industria dexó.

Otru día falaré d’eses families de comerciantes que ficieron del centru de Xixón un llugar mui vivible. Y d’esos negocios que conformaben la ciudá y que finaron por desapaecer, a manes de Hipermercaos, Supermercaos, y Grandes superficies qu’invierten les sos ganancies fuera d’Asturies. Como tolo nuestro.