close
El Día de los neños que trabayen, o un mundu miserable.

El Día de los neños que trabayen, o un mundu miserable.

2009-07-09trabayu infantil404Visitas

minasEl pasáu día 12 de Xunu cellebróse’l Día Mundial escontra’l Trabayu Infantil. ¿Dalguién lo sabía? ¿Nalgún sitiu se ficieron manifestaciones pa la so abolición? ¿Los intelectuales del mundu firmaron manifiestos pidiendo l’acabu d’esta esplotación? ¿Los Padres de la Ilesia que glayen escontra l’albuertu y en defensa la vida llevantaron la so voz profética en favor d’esos neños/es? Pa qué siguir… Esti ye un mundu miserable que permite que 127 millones de neños menores de 15 años trabayen.

La mayor parte d’esos neños/es alcuéntrense nel África subsahariana: cuasimente un terciu (unos 48 millones). Ye un trabayu ensin proteición llegal nin reglamentaria, qu’abarca tolos sectores de la economía: l’agrícola, la industria, el comerciu, la hostelería, el serviciu domésticu…

73 millones d’esos neños son menores de 10 años y nun hai que pensar que ye namás nos paises subdesarrollaos, 2’5 millones fáenlo en paises desarrollaos. Cada añu muerren 22.ooo neños/es n’accidentes rellacionaos col trabayu. Eso ensin cuntar colos que tán atrapaos na esclavitú, el tráficu de neños, la prostitución, la pornografía y otres actividaes illegales.

Ya Frederic Engels denunció, en 1845, la situación de la clase obrera n’Inglaterra y, más dafechamente, la de los neños: «Nes mines de carbón y fierru, que son esplotaes cuasi del mesmu mou, trabayen neños de cuatro, cinco y siete años, pero los más d’ellos son mayores d’ocho años (…) Solos na escuridá, tienen de permanecer tolos díes 12 hores nun pasaxe estrenchu y llentu…» Güei, en plenu sieglu XXI, 500 mil neños y adolescentes trabayen na minería artesanal en Sudamérica, según datos de la OIT.ninio-mina-2

Paécenme mui bien toles campañes que se faigan escontra’l calentamientu global, les emisiones de CO2, l’efeutu invernaderu, la desertización del planeta y el futuru de la humanidá. Pero demientres haiga neños y neñes que, a día de güei, tean realizando trabayos que perxudiquen el so desarrollu psicolóxicu, físicu y emocional, acabar con eso tien prioridá sobre cualquier otru plan de futuru. Y mentantu eso siga asocediendo, nun dexaremos de ser un mundu miserable, nel meyor de los casos apináu de bones intenciones.