Mientres nosotros cellebrábemos el martes d’Antroxu, nel restu’l mundu lo que se «cellebraba» (fádiame hasta llamalo cellebración) yera’l Día Internacional escontra la utilización de los neños-soldaos. Diecisiete paises, la mayoría africanos, pero tamién sudamericanos y asiáticos, tienen el duldosu honor de formar el llistáu de los que toleren, aprueben, o nun eliminen, esi andaz tan terroríficu que ye’l del emplegu de neños pa la guerra.
Ye perdifícil calcular cuántos neños-soldaos habrá espardíos pel mundu, pero’l cálculu que suel facese ye d’unos trescientos mil. Voi ponelo en númberos pa que se vea más nidio: 300.000 neños son emplegaos na guerra, como suxetos activos, ye dicir, garrando’l Kalashnikov y matando xente, como escudos humanos, como correos pa llevar mensaxes o como esclavos sexuales. Nesti aspeutu, hai tamién munches neñes utilizaes, víctimes d’estos asesinos y xenocides nun delitu pal que yá esiste un precedente del Tribunal Penal Internacional que lu considera, al reclutamientu de neños-soldaos, «Crímenes de Guerra».
Sientiendo falar a dalgún o dalguna cooperante que s’encarga de la rehabilitación d’estos neños, pónense-y a ún los
pelos de punta. El conocíu periodista Jon Sistiaga, comentaba esti día cómo, p’algamar el mayor «rendimientu» d’estos neños y neñes soldaos, se los droga, se-yos dan sustancies que-yos proporcionen un valor suicida y, aprovechando la so curtia edá, y el fechu de ser la mayoría analfabetos, se los engaña pa dir al combate. Dándo-yos unes yerbes que dicen que los faen inmortales, dispáren-yos con un Kalashnikov descargáu pa que compreben que los tiros nun los maten.
Sé que ye mui difícil que nosotros, na comodidá de les nuestres cases y de la nuestra vidina más o menos civilizada, seyamos a sentir lo que supón esto que toi cuntando. Nin yo mesmu soi capaz de sentilo dafechu. Siempres nos dieron pena los neños como víctimes de la guerra. Pero tien de ser muncho más terrible entovía, como nestos casos, ser suxetu activu de la mésma. Dalgo que va a marcalos, de xuro, pa tola vida. Habría, pues, que crear un estáu de conciencia que ficiera a los gobiernos tomar, d’una vez por toes, en serio esti tema. Facelu figurar en toles axendes de conversaciones internacionales, como la que va a facese esta primavera al rodiu de la venta d’armes, y prohibir dicha venta a esos paises que nun esanicien del so territoriu la esplotación de neños-soldaos. Una llácara que tendría que nos ‘avergoñar a tola raza humana.
