close
El divinu Frankie

El divinu Frankie

2015-12-19Dean MartinFrank Sinatra1021Visitas

SinatraYera divinu cuando se lu sentía cantar, pero abondo demoníacu na so vida normal y dicen que con tendencies mafioses. La voz cálida de Frank Sinatra -y el restu del cuerpu- cumpliría agora los cien años, como la Mamá de la película de Saura. Teníalo difícil con una vida tan disipada. Pese a que yera un tipu pequeñán y desgarbáu, traía a les moces de calle, tal y como cantaba aquel grupu folklóricu vascu que se llamaben «Los Xey» na canción titulada «Los feos»: «Todos los  feos se llevan las chicas más guapas/ Agustín Lara/ y un tal Sinatra…» Pero cuando’l divinu Frankie abría la boca pa cantar… non lu había meyor. Ye’l cantante que, pal mio modestu talantar, daba meyor les notes baxes. Xubía bien, pero neses canciones qu’hai que dar dos notes más baxes que’l gochu… bordábalo.

Frankie tenía tamién una pandilla o cuadrilla mui poco recomendable, como él. Xente simpática, pero un poco/muncho sinvergoñes. De toos ellos  el mio favoritu yera Dean Martin. Bon actor cuando lu supieron dirixir, como Howard Hawks en «Río Bravo«, y tamién un gran cantante. Tenía, Martin, una cualidá que-y daba muncha envidia al so amigu Frankie: la espontaneidá. Cuando Sinatra facía una gala, preparaba con cuidáu tolos detalles, hasta los chistes que diba a «improvisar». Llueu, salía un momentín Dean Martín, cantaba una simpática canción y dicía un par de coses improvisaes de verdá, y metíase al públicu -de Sinatra- nel bolsu. Eso dába-y muncha rabia al so amigu. Amás de que, polo que cuenten los sos biógrafos, Dean Martin pese a la so fama, nun bebía alcohol. Pero, bueno, falaba de Frankie: La voz. Tengo un discu con toles sos canciones más clásiques y ye un de los mios favoritos cuando me toca planchar (que ye cuasi siempre), pero pa ser sinceru y nun engañavos, tamién tengo otru del so amigu Martin que ye tamién favoritu. Voi procurar que Frankie nun s’entere porque yá sabéis que mal xeniu tien. Igual un día d’estos mándame a un par d’esbirros pa que me rompan les piernes. Pero mentanto, y n’homenaxe a esi cantante ensin igual que cumpliría 100 años si se tuviere cuidao meyor, voi escuchar una vuelta más «My way«. Seguro que si-y la canta a San Pedro, lu cambia de parroquia.

Leave a Response