Tuvimos pasando dellos díes pela provincia de Valladolid, tratando de «secar» un poco los güesos de la humedanza asturiana. Ellí, con centru na que fue importante villa de Medina del Campo, percorrimos dalgunos requexos cargaos de sentíu históricu. Na propia Medina, tuvimos nel interesante Museo de Las Ferias. Nel ta recoyida la documentación que cinca a les famoses feries de Medina, cellebraes nos sieglos XV y XVI. Unes feries de calter internacional y que fueron, en dala manera, los anicios del actual comerciu. Nelles participaben tolos productos de la época: tapices, manufactures textiles, un importantísimu grupu empobináu a los llibros, etc. Y penriba de too, los cambistes, banqueros, comerciantes que teníen un espaciu principalísimu nel centru la Plaza Mayor. Ehí s’afitó práuticamente la lletra de cambiu, como mediu de pagu, tal y como se caltuvo a lo llargo de munchos sieglos hasta la nuestra época. Poro, yo que tuvi de trabayar abondu tiempu con elles, préstame tener el facsimil d’una de payares de 1493, librada ente Medina del Campo y Florencia con más o menos les mesmes carauterístiques que diben perdurar. Un interesante muséu que paga la pena visitar.
Nun pasa lo mesmo col famosu Castillo de la Mota, d’espléndida planta, pero que ta tan retocáu y amaneráu que nada guarda del primitivu, más qu’una parte de la muralla que pue vese nel suétanu. De «falsu históricu», lo que quieras.
Dalgo asemeyao ocurre col Palaciu Real Testamentariu, onde la Reina Isabel la Católica fizo testamentu y terminó
morriendo en payares de 1504. Del edificiu primitivu poco queda, y lo qu’ufierten al visitante ye una recreación de la época, con un apartáu pa Colón y el decoráu de la estancia onde morrió la reina, con una cama fecha a imitación y el famosu cuadru del pintor Rosales, tan conocíu, que recueye esi momentu. Por cierto, que ye curioso que Rosales pintare a la so fía Juana (la lloca), al pie de la cama, xunto a so padre Fernando, cuando lo cierto ye que s’atopaba en Flandes en compañía del so maríu Felipe (el guapu).
La villa d’Olmedo, a una media hora de Medina, ye un pueblín guapu, cargáu d’arquiteutura mozárabe nes sos ilesies, y con dos arcos d’entrada y una muralla tamién prestosos. Los museos qu’anuncia son «El palacio del caballero de Olmedo«, que como tol mundu sabe ye un personaxe de ficción, salíu de la mano del gran Lope, y nel que se recrea, tamién, dalgo de la época na que trescurre l’aición. Vistíos, ologrames, muebles… pero too inventao, claro. L’otru muséu, el Museo del Mudejar ye, en realidá, como s’encarguen de dicir a la entrada, un parque temáticu onde se reproducen, a escala, ventiún répliques del mudejar castellanu y llionés. O seya, pa dar una vueltina colos neños y xugar ellí con ellos.
Lo más interesante de lo que vimos alcuéntrase na tamién histórica villa de Madrigal de las Altas Torres, (¡qué guapu nombre…!) pequeñísima población onde nació, nel Palaciu de Juan II, Isabel la Católica. Equí hai bastante historia y menos «falso histórico», pues la comunidá d’Agustines que lu habita trata de conservalo lo más auténtico posible. L’edificiu, clásicu palaciu castellanu del sieglu XV, caltién cuasi como yera la sala nomada de Les Cortes, pues nel s’aconceyaron Las Cortes del Reino en 1476 y acorica una serie d’ayalgues de la época más qu’interesantes: cuadros de Ribera, escultures de Berruguete, Alonso Cano y Juan de Juni, documentos de los Reis Catolicos, l’únicu cuadru, anónimu, onde apaecen xuntos los dos reis… y un maraviosu «San Agustín» del asturianu Juan Carreño de Miranda, que sólo por elli pagaría la pena’l desplazamientu.
En fin, qu’hubo de too nesta pequeña vacación a tierres castellanes. Agora lo que ta claro ye que cada vuelta abunden más les histories que se monten al rodiu d’un fechu históricu, pero ensin nengún rastru orixinal del mésmu. Munchu panel, munchu vidiu, munchu decoráu, pero poco que ver de lo daveres, de lo auténtico.
(Semeyes: A la manzorga Olmedo. A la mandrecha Madrigal de las Altas Torres)
