close
El gran Johan

El gran Johan

2016-03-24Johan cruyff386Visitas

cruyffEntovía nun se llamaba Champions, yera namás (y na menos) que La Copa d’Europa. Corría l’añu 1973 y el Real Madrid de Pirri, Amancio y Santillana, venía d’eliminar al Dinamo de Kiev en cuartos de final. Naide n’España conocía al Ajax, al que se tomaba un poco en coña porque asonsañaba a un xabón de llavadora que se llamaba tamién asina. El primer partíu fue n’Amsterdan y los holandeses ganaron 2-1. Esperábase con gana de revancha’l partíu de vuelta nel Bernabéu. L’Ajax, l’equipu del xabón de llavadora volvió a ganar, por 0-1, eliminando a los madridistes y llegando a la final que tamién ganaron. Recuerdo ver el partíu televisáu y la sensación de maravía que me dexaron. Yeren una máquina de xugar y, ente toos ellos, de nome perfeutamente desconocíu, destacaba un delanteru espigáu y elegante que llevaba por nome Cruyff.

Tuvimos, depués, la suerte de qu’aquel maraviosu delanteru xugare unos cuantos años nel Barcelona y asinaCruyff 2 pudimos siguir los sos grandes ésitos y el so fútbol únicu. Cruyff tenía una gran presencia nel campu. Mandaba, colocaba y cuando había qu’echar bronques, echábales. Yera un delanteru completu, pues remataba con dambes piernes y diba bien de cabeza, pero la so mayor virtú, al mio modestu xuiciu, yera’l so fabulosu cambiu de ritmu. Naide lo facía como elli. Paecía qu’entretenía’l balón nel centru del campu y de sópitu pegaba un acelerón y avanzaba como un tiru hacia la puerta porque, amás, tenía un regate en velocidá mortíferu.

Tamién como entrenador y como persona tuvo’l so carauter. Asina fizo munchos amigos y, tamién, munchos enemigos. Ye lo que pasa colos grandes homes, nun pasen desapercibíos. Quiciás si lu tuvieren amarrao un poco más en corto nun morriere tan xoven. Cuéntase que l’entrenador del Ajax, el rumanu Kovács, dexábalu fumar hasta nel vestuariu enantes de salir al campu. Llueu pasóse al chupa-chups, pero igual yá fue tarde.

Con Johan Cruyff muerre un de los grandes. Como Di Stefano, Beckenbauer, Maradona, Pele… y agora Messi o Cristiano. Esos xugadores a los que paga la pena ver nun campu de fútbol, anque seya col equipu contrariu, porque’l fútbol ye pasión, pero tamién espectáculu, y don Johan yera un gran espectáculu. En fin, que’l deporte mundial ta de lutu. Descanse en paz el gran delanteru.