Costóme siempre muncho entender los asuntos políticos italianos. Pásame como a aquel amigu míu que, va yá munchu tiempu, dicíame: «Nun sé qué pasa n’Italia, tán siempre con rumores». Lo que pasaba yera que’l Primer Ministru italianu llamábase, precisamente, Mariano Rumor, y entós na prensa siempre salía: «Rumor, n’Italia, fai esto o l’otro…».
Acaben de cellebrase nueves elleiciones nesi país col que nos xunen tantes coses, y los titulares de prensa recueyen la «ingobernabilidá» a la que tán empobinaos col resultáu que dieron les urnes. La mio entruga, inocente, ye: «¿…y nun será qu’hai qu’esplorar otru tipu de facer política? ¿Qu’esa supuesta «gobernabilidá» nun ye la que quieren la mayoría los italianos?» La preba clara d’esto que digo ye’l fundimientu del que fue Primer Ministru, Monti, puesto ehí «pelos mercaos», y el descomanáu ésitu que tuvo l’humorista Beppe Grillo, col so Movimientu 5 Estrelles, qu’algamó un 25,5 del total de los votos. Un movimientu, heteroxéneu, inclasificable, pero qu’amuesa un descontentu fondu hacia los políticos actuales y el so mou de facer política, cada vuelta más alloñáu de la cai. La incógnita, agora, va a ser cómo remanará Grillo toos esos diputaos y senadores que tien, pues una cosa ye protestar escontra lo qu’hai, no que tán toos d’alcuerdu, y otra más difícil encadarmar, a partir d’eso, un movimientu coordináu, con unos oxetivos nidios y una forma de consiguilos. O seya, el pasu de «eso nun lo queremos», a «vamos facer esto otro d’esta manera». Ta mui bien la «provocación» y la crítica de les instituciones, pero va a ser mui complicao organizar a tanta xente de mou asambleariu, y si nun ye asina, el pelligru ye cayer nos mesmos vicios que los partíos a los que se critica. En cualquier casu, esta situación «ingobernable» debiere abri-yos los güeyos a los que faen política, y nun sólo n’Italia, y a esa xente que, incomprensiblemente, siguen dándo-y la mínima credibilidá a personaxes d’opereta como Berlusconi. Eso sí que nun s’entiende. Tien de ser un ciertu «síndrome d’Estocolmo», o esa almiración que dalgunes persones sienten polo qu’envidien, como pasó equí con
aquel Gil y Gil, o aquel Ruiz Mateos.
El títulu d’esti comentariu xugaba, amás de col «Grillu» trunfante, con otru «grillu» metepates: el señor Cantó. Nun voi a estendeme nes sos declaraciones porque yá rectificó (en parte), y porque l’abuchéu fue tan grande que nun fai falta xiblalu más. Pero nun se pue dicir, nun tema tan sensible como’l del maltratu de les muyeres, con tantes víctimes conocíes y tantes otres, llamentablemente, en silenciu, que la mayoría de les que denuncien son mentira. Ye d’una frivolidá que lu torga pa facer política. ¿Qué hai dalgunos casos nos que se denuncia por otros motivos? Seguro. Pero eso pasa en cualisquier otru aspeutu de la vida. Habrá que descubrir esos casos, y castigalos. Pero facer, d’eso, un argumentu no que ye una realidá «sangrante», y emplego’l términu a posta, ye una falacia y una cobardía. Espero que lo pague políticamente, porque socialmente ya tien abondu desprestixu.
(Semeyes d’ «El País»)
