«El león de oro» ye un grupu coral que yá tien andáu un llargu y prestixosu camín, a tal puntu que tán a piques de cumplir los XXV años d’esistencia. Un camín atarraquitáu de premios que lu convierten nun referente (sí, ye una pallabra repunante) n’Asturies, n’España y nel estranxeru (Europa, EE.XX, África…) El so direutor y fundador ye’l lluanquín Marco Antonio García de Paz, home cultu, trabayador y gran músicu. El so llabor al frente de l’agrupación coral nun tien preciu y quiciás nun se-y dio’l méritu y el reconocimientu que merecía. Nunca ye tarde.
Pa esti conciertu entamáu pola Sociedá Filarmónica de Xixón el coru presentó un programa cultu cuyu encontu principal fue’l «Cantus Missae» (Opus 109) de Josef Rheinberger (tien otru títulu más llargu que nun pongo) Xunto con elli, dos Salmos de Mendelssohn (el 100 y el 43), un Lied de Brahms (Op. 30) y una obra, vamos llamar «moderna», del compositor norteamericanu Eric Whitacre: «When David Heard» (ye de 1999)
De la misa, dientro del so altísimu nivel, yo destacaría’l «Credo», sobre too porque suel ser la parte más llarga y menos vistosa, y carez del tonu vibrante del «Gloria» que da más «marcha» al públicu. Esti «Credo» fue guapísimu, con una gran aportación de los baxos, que paecíen salir del propiu fondu de la tierra. Pero, en xeneral, tola misa fue un gozu pa los oyíos y siguímosla nun silenciu total: «como en misa», diríemos en broma.
Del restu, a min prestóme más el segundu Salmu de Mendelsshon que’l primeru y del Lied de Brahms destacar el «Amén» final que fue una verdadera maraviya. En cuantes a la obra «moderna», de Whitacre, dicir que m’encantó. Trátase d’un llargu llamentu que pronuncia’l Rei David al enterase de la muerte del so fíu Absalón. Nun ye que padre y fíu se llevaren mui bien, de fechu Absalón intentare quitá-y el tronu, pero’l conocimientu del so asesinatu causa una impresión tan fonda nel padre que nun ye quien a manifestalo más que con un llamentu continuáu. Un gritu sincopáu, repetitivu, esgañador. Equí los distinos elementos del coru van siguiéndose y sobreponiéndose unos a otros en tolos tonos imaxinables. Dacuando, tal paez que, en vez de voces, trátase d’otros instrumentos musicales. Al final la obra dulcifica’l tonu esgañáu como si David yá llegare a aceutar el tráxicu final d’Absalón y permaneciere namás el so dolor interior. Guapísimo.
Al aniciu del actu, una voz «en off» pidió por megafonía que, d’una vez por toes, la música y les artes trunfaren sobre les armes y la guerra. Y a la fin, el propiu direutor informó qu’un de los integrantes del coru yera de nacionalidá Ucraniana. Dambos anuncios atroparon munchos aplausos. Y una reflexón final: ¡qué méritu tien que, por mor de la pandemia, los componentes del coru tuvieren que cantar, una vuelta más, cola mazcarina puesta! A dalgunos cuéstanos respirar con ella, fixáivos lo que ye cantar.
Namás. Esto ye lo qu’un modestu aficionáu a la música pue dicir d’esti prestosísimu conciertu de la Filarmónica de Xixón. Seguro qu’un espertu na materia podría amestar munches más coses. Pero, bueno, el casu ye disfrutalo.
