Yá tengo dicho n’otres ocasiones que me cuesta muncho falar del albuertu. Que lu considero un tema tan delicáu y que supón tanto pa les muyeres, que nun se pue aldericar sobre él de mou superficial. Nun voi dicir que namás les muyeres debieren decidir sobre ello, porque la sociedá ta formada por dambos sexos y los dos debemos opinar sobre cualuquier asuntu social, pero sí que, en casu de conflictu, el so paicer debiere, nesti tema, prevalecer penriba’l nuestru. En cualquier casu, y puesto que ye un paisano’l que ta emperráu en cambiar l’actual llexislación sobre l’albuertu, creo que yo tamién tengo drechu a opinar sobre ello.
Y la mio opinión ye que nun alcuentro razones bultables pa camudar una llei que, según un mayoritariu consensu social, ta funcionando bastante bien. Dende xunetu de 2010 les muyeres tienen llibertá p’albortar dientro de les primeres 14 selmanes de xestación, ensin tener que cumplir más requisitos. Trátase, pues, de lo que se llama una «llei de plazos», homologada cola mayoría de los paises del nuestru entornu, que ye dalgo que siempre utilicen dende’l gobiernu cuando nos quieren quitar dalgún drechu. Esta llei que ta en vigor, nun plantegó nengún problema social nin fizo medrar el númberu d’albuertos, como dalgunos anunciaben, y gocia de l’aprobación de la mayoría los españoles según les encuestes que se vienen faciendo.
Pero agora vien esi superfacha, santurrón y mexapiles del ministru de Xusticia, y empérrase en cambiar esta civilizada llei, por otra que nun se sabe mui bien cómo va a ser, porque anda «amoriando la perdiz» d’un llau pa otru, pero que, polo que se peñera, va a retrotraenos a la época franquista. Nin siquier nun casu como’l del fetu con malformaciones, va a ser motivu llegal suficiente pa qu’una muyer pueda albortar. Hai que trayer a esi neñu al mundu, anque seya pa sofrir él, los pás y la sociedá entera. La conclusión va a ser un retrocesu a murnies époques pasaes, nes que ses criminalizaba a la muyer, esistía una inseguridá llegal absoluta, y discriminábase a les muyeres pola so capacidá económica: les riques podíen dir a albortar al estranxeru.
Yo entiendo que les relixones tengan les sos propies opiniones sobre los temes individuales o sociales, y
qu’eses opiniones tengan que les aceptar los fieles que quieran pertenecer a dalguna d’elles. Pero eso ye dalgo que nun se pue imponer a una sociedá, como la española, que ye dafechamente laica, como sopelexa la Constitución, y que por tanto tien de tener unes lleis al marxe de los credos relixosos. Ye como si agora quixeren prohibinos a los españoles comer carne de gochu, porque hai una relixón que lo prohibe. Pues meyor pa ellos, pero eso a mi nun m’afeuta. Y ye que nun hai que confundir pecáu con delitu.
Ensin embargu, esti Gallardón, que durante un tiempu pasó por ser un «tío progre», quier colanos como lleis d’obligáu cumplimientu, les disposiciones que defende la Conferencia Episcopal pa los sos súbditos católicos. O seya, que pretende facer como los rexímenes islamistes, que gobiernen col Corán na mano. Pues non, oiga. Nun ye asina. La visión sobre l’albuertu que tienen el señor Rouco y el «viscosu» esi del Camino que-yos la coloquen al so «cuerpu místicu», pero nosotros queremos ser una sociedá democrática, llibre (na midida que podamos) y laica, y llexislanos por lleis modernes y civilizaes, que nun tengan que ver col medievo nin cola Inquisición. Porque, amás, depués d’esta batalla relixo-política, vendrá la del matrimoniu gai, y más alantre la del divorciu. Ye dicir, pretenden, al empar col gobiernu, quitanos los drechos cívicos que venimos esfrutando, pa volvenos a la época del escurantismu y la fidelidá a la Santa Ilesia Católica, Apostólica y Romana, onde toos yéremos «oveyes», y les muyeres muncho más. Nun hai que lo consentir y, de mano, hai que pidir la dimisión d’esi paisano que, más que de ministru d’un país democráticu, paez qu’exerce de molacín particular del señor Rocu Varela. Tocando la campanina y too.