close
El mundu al carayu

El mundu al carayu

2021-08-14Calentamientu global203Visitas

Ves les imáxenes nel telediariu y meten mieu. Fueu. Fueu per toes partes y en tolos paises: Hectárees y hectárees arrasaes, amburaes, calcinaes… Sí,  ye verdá qu’esto siempre esistió, pero ¿tanto como agora? ¿Tamos tovía a tiempu d’aparar esta llaceria causada, quién lo dubia, pol calentamientu global?

Diz un informa unviáu por decenes de científicos a la ONU que los seres humanos xubimos 1,1 graos Celsius la temperatura de la tierra nel caberu sieglu. Na menos que 195 paises apáutense col conteníu d’esi informe. Les consecuencies acabamos d’enumerales al empiezu: viesques, colleches, semaos, cases y persones algamaos per incendios inaparables en Grecia, Estaos Xuníos, Italia, Canadá… l’Amazonía principió a emitir dióxidu de carbonu y Madagascar pasa fame por mor de la gran seca que l’asuela. Les temperaturas lleguen y sobrepasen los 50º.

Nos caberos 125.000 años nunca nun fizo tantu calor nel planeta como na última década, según l’informe del Grupu Intergubernamental d’Espertos sobre’l cambiu climáticu. La xente enxamás quemó tantu carbón, gas o petróleu como agora. Y eso nun sólo nos afeuta a los humanos, tamién otres especies tán a piques de sofrir grandes malures o esapaecer. Cuenta’l New York Times que la lluz que surde de les nuestres ciudaes peles nueches yá ta mermando la capacidá de munchos animales pa orientase gracies a la lluz de les estrelles.

Hai entovía una pequeña posibilidá d’estabilizar el calentamientu global al rodiu de los 1,5 graos Celsius. Habrá que l’aprovechar enantes qu’arrasemos más el planeta nel que vivimos y queremos que vivan los nuestros nietos. Enantes de que nos quedemos ensin el resplandir de les estrelles, el bris frescu qu’entra pela ventana y l’aire que respiramos. Pero hai que se poner a ello yá.
(Semeya: AFP/Angelos Tzortzinis)