Ayeri, nel Palaciu Real, nun actu al qu’asistiere tola familia real española, el nietu d’Alfonso XIII impuso la másima condecoración militar, la Laureada de San Fernando, al reximientu de Caballería «Alcántara» pol so comportamientu de fai 91 años nel llamáu Desastre de Annual. Hai que recordar que nel entornu de la población rifeña d’Annual, en Marruecos, morrieron ente 8.000 y 10.000 españoles a manos de les fuerces rifeñes d’Abd el-Krim. Estes muertes fueron provocaes por una conducta «chulesca» y temeraria del Xeneral español Fernández-Silvestre («la única forma de tener éxito con los moros es decapitarlos a todos«) y la incapacidá organizativa del Xeneral Berenguer, Altu Comisariu en Tetuán. Un exércitu colonial, formáu polos reclutas más probes d’España (los que teníen perres «compraben» a un sustitutu), analfabetos na so mayoría, mal alimentaos, mal equipaos y mal armaos, fueron aniquilaos por unes tribus rifeñes que tomaron venganza escontra los sos colonizadores.
Paez que’l Rei Alfonso XIII, que tenía intereses económicos nes mines del Rif, tuvo una actitú mui poco digna del so cargu, al alendar primero al so íntimu amigu Silvestre pa qu’emprendiere una arriesgadísima campaña de «pacificación», y depués col comportamientu al respective de los prisioneros (pocos, porque la mayoría morrieron n’aquellos campos de batalla) a los que se lliberó a cambio d’un rescate económicu. Nunca se llegó a comprobar, pero paez ser que’l susodichu Rei, al enterase del avance de les tropes del Xeneral Fernández-Silvestre ente les cábiles rifeñes, mandó-y un telegrama que dicía: «Ole tus cojones». Y sí paez comprobao que cuando-y dixeron, meses depués del desastre, que pa lliberar a los soldaos españoles en manes d’Abd el-Krim, había que pagar 80.000 duros, comentó en público: «Nunca creyí que tuviere tan cara la carne de «gallina»». Les responsabilidaes d’aquellos militares y les del Rei fueron recoyíes nel llamáu «Expediente Picasso», un informe redactáu pol Xeneral Juan Picasso. Pero antes de que l’informe se debatiere nel plenu de les Cortes, el Xeneral Primo de Rivera dio un golpe d’Estáu (1923) y echóse tierra al asuntu.
Agora, 91 años depués, el nietu d’aquel Rei indignu condecora (a títulu póstumu) a unos participantes n’aquellos fechos,
pero nun tien nin una pallabra de crítica pa los mandos que los empuxaron a la muerte, nin pal so pariente que lo alendó política y personalmente. «A quienes lucharon heróicamente bajo vuestros colores», dixo’l so nietu. Ye lo de siempre, los probes, los d’abaxo, la «carne de cañón», son los que lluchen «heróicamente» pal beneficiu y la complacencia de los que manden. Yá lo sabíemos, pero podíen disimular un poco.
Nota.- Pal que quiera saber cómo fue aquello, hai una novela durísima y mui guapa de Ramón J. Sender onde se rellata de primera mano. Titúlase «Imán». Hai que la lleer.
Un exércitu coUn
