Nun sé cuántu tiempu habrá que da-y al nuevu (yá non tan nuevu) presidente de los Estaos Xunío pa valorar les sos autuaciones internacionales. Yá pasó, abondamente, el plazu de «cortesía» y nun paez que lo que ta faciendo cumpla dafechu coles promeses sopelexaes. Prometer ye gratis. Val que tien l’enemigu en casa, pero eso yá lo persabía él, y toos nosotros. Podemos da-y un aprobáu nel tema sanitariu, pol intentu de xeneralizar la sanidá, anque tien entovía munchu camín que percorrer. Pero nel planu internacional nun fai más qu’esbayar toles esperances que munchos pueblos, munches organizaciones y muncha xente punxeron n’él.
Nel tema Palestín, ná de ná. Nin siquier promeses. Israel sigue llevantando nuevos asentamientos en territoriu árabe, cola complicidá de los Estaos Xuníos. Y el reconocimientu d’un Estáu Palestín (promesa númberu ún del señor Obama) paez tar más lloñe que nunca. Por si acasu, que nun se-yos ocurra plantegalo na ONU.
Na reciente reunión de la FAO sobre la fame nel mundu, nun ye que tuvieren pocu interés, ye que nin siquier unviaron representante. Que la xente muerra a millones de fame, nun-yos paez importante.
Nel tema de les emisiones de CO2, y de la contaminación en xeneral, más de lo mesmo.
Y agora viaxa a China pa firmar unos acuerdos de cooperación con otru de los paises más contaminantes y menos democráticos. Tamos acabantes de lleer que los opositores, o disidentes, en China son deteníos, apilaos en cárceles y hasta almacenes, torturaos y munchos d’ellos axusticiaos. Pero, amigu, los negocios son los negocios, y China ye un sociu mui importante y al que, amás, dében-y una «estrapayada» de millones de dólares, del deficit de la balanza de pagos ente los dos paises.
Destaca esta actitú col xigante chinu (1300 millones de persones) cola que caltienen cola pequeña Cuba (11 millones). Estos díes, el señor Obama acaba de prorrogar l’embargu a Cuba, al menos por otru añu más, porque nun ye un país «democráticu». Podemos tener de los dirixentes políticos cubanos, y del so réximen, la opinión personal que queramos (la mía ye mui negativa), pero lo que nun ye de recibu ye castigar a tou un pueblu por culpa de los sos dirixentes. Eso ye como si tolos españoles tuviéremos que pagar por ser Franco y el so réximen una dictadura.
Nesti momentu Cuba enfréntase a fondes restriciones na importación de melecines, tecnoloxía y equipu mélicu dende Estaos Xuníos o dende cualquier empresa norteamericana nel estranxeru, lo que pon en peligru la salú de millones de persones. Los productos patentaos en EE.XX. o que contengan más d’un 20% de pieces o componentes fabricaos ellí, nun puen esportase a Cuba, anque se fabriquen en terceros paises.
Según datos de Naciones Xuníes, el nun poder importar productos nutricionales, contribui a que se dean altos índices d’anemia por deficiencia de fierru. Esti problema afeuta al 37,5% de los menores de tres años. La salú de los neños y neñes peligra tamién, pola decisión norteamericana d’anular un pedíu de tres millones de xeringues desechables, realizáu en 2007 pola Alianza Global pola Vacunación y la Inmunización (GAVI), en cuantes se supo que les unidaes taben empobinaes a l’aplicación d’un programa en Cuba. Otramiente ocurre col programa de la ONU pa prevenir y lluchar escontra el VIH/sida na islla.
Nun sigo. Esti nuevu Robin Hood, que roba a los probes, pa da-yos a los ricos, ya algamó, polo menos nel mio casu, el cupu de paciencia que tenía. O cambia dafechu y con premura la so actuación internacional, o habrá que lu poner na llista d’enemigos de la humanidá. Siéntolo, porque’l rapaz prometía.
