En Tremañes, el barriu onde ella nació, Mª Teresa González tien yá un parque col so nome. Ta llantáu a pocos metros de la casa que la vio nacer, y na faza onde xugare de neña. Enantes yeren caleyes, güertes y horros. Agora son cases nueves y xente nuevo. Munchos enxamás oyeríen falar d’aquella neña flaca, de cara sonriente, que de mayor tamién suañaba ser princesa, como diz nun de los sos poemes. Una neña que nun llegó a princesa, pero sí a ser una gran escritora y, sobre too, una gran persona. Echámosla de menos.
Na inauguración oficial del parque intervino la conceyala Dulce Gallego, que tuvo unes guapes pallabres de recuerdu, la Directora Xeneral de Política Llingüística, Consuelo Vega, que faló de la so figura como escritora n’asturianu, el Conceyal Montes Estrada, que comentó’l so compromisu social y llaboral, y l’actriz Marisa Vallejo lleó un poema de l’autora. Finalmente, la
familia dimos les gracies a toos, principalmente a los amigos y amigues, munchos presentes y dellos ausentes, que solicitaron, y llograron, que’l ayuntamientu dedicara esti parque a María Teresa. Ta claro que la so memoria perdurará, a traviés del nuestru recuerdu, de la so obra lliteraria y agora d’esti parque al que, de xuro, dirán a xugar los neños, a pasiar garraes de la mano les parexines y a tomar el sol los vieyos. O seya, la vida mesma. Dalgo qu’ella siempre amó y de la que taría mui arguyosa. Agora, como diximos ellí, namás falta que’l pueblu de Tremañes-y ponga’l mote que más-y preste a esti llugar del barriu, pa que, d’esi mou, tea dafechamente integráu na so vida: ´»El parquín»; «El parcón»; «El parque la escritora» o «El parque de Teresina». Como la xente quiera identificalu. Eso ye lo qu’ella querría.
