Había una seición naquella añorada revista nomada «La Codorniz» que llevaba por títulu: «La oficina siniestra«. Viase siempre a un adineráu señorón fumandu un puru, llóxicamente «el xefe», y una retafila de pequeños oficinistes alredor suyu en postures d’adoración. Dalgún d’ellos taba encadenáu y llevaba una camisa na que se lleía: «Pelota 7.525» (o cualquier otru númberu). La seición firmábala Pablo, que yera Pablo San José García, un humorista agudu y subversivu que nun sé si entovía vive o non.
Fue esi’l recuerdu que se me vieno al maxín al ver les imáxenes de Mariano Rajoy en presencia del «emperador» Obama. Un paisanu que diba a rendir «pleitesía» a un superior, pa qu’ésti-y pasára la mano percima’l llombu, como cuando’l nuestru perrín o gatín pórtense bien en casa. Sé que quiciás toi siendo inxustu, y que de la visita del nuestru Presidente namás van siguise coses bones. Yá sabes, confianza de los inversores y toes eses mandangues que nos cuenten pa sofitar que la crisis, acabóse. Lo malo ye que la crisis nun acabó, que nengún de nosotros, nin los que tán muncho peor, noten esos «brotes verdes» porque de ser asina dalgún de los que ta pasando fame seguru que los comería. Pero ye que, amás, esos famosos «inversores» que meten les sos perres na «marca España», nun lo faen porque tengan confianza y quieran axudar al progresu de la nuestra industria y comerciu. Los qu’invierten equí son los propietarios d’esos fondos «utres», oportunistes en cata de «chollos» pa comprar barato, «despiezar» y vender.
«Ta llegando dineru de toes partes», dixo l’otru día don Emilio Botín, que d’eso sabe muncho. Claro, y llega siguiendo les instrucciones del magnate norteamericanu Donald Trump, que dixo nel 2012: «Te están dando las tierras por nada, te lo están dando todo por nada. España es un país increible, pero como está enfermo es el momento de aprovecharse». Dicir eso en público ye’l colmu de la sinvergoncería, pero ye que son impunes. Ellos manden y nosotros agachar les oreyes y a esperar que vengan, compren, despidan y marchen pa otru llau. Esa ye la confianza que damos a los inversores estranxeros, que tanto cacarexa don Mariano «el Presi».
En cualquier casu, lo de Rajoy entiéndolo. Busca la confirmación de que les órdenes que-y dan los americanos, el FMI, el
Bancu Mundial y demás piratas del Caribe tán cumpliéndose. ¡Faltaría más! Obama fírma-y el cuadernu de notes porque ye un bon rapaz. Y de pasu, pa que la xente nun sospeche, suelta eso de: «Cuidadín col paru, ¿eh?, nun se nos vaya la mano…». Y ye que Obama, nel fondu, ye progre. Como aquel Aznar que falaba catalán na intimidá, Obama exerce de progre na intimidá. Y si nun critica la proletarización de la sociedá española, onde la clas media ta desapaiciendo, los recortes en servicios públicos, les privatizaciones, los despidos a la carta y ensin indemnización, etc. etc. ye porque nun lo sabe. Igual qu’aquellos que defendíen a Franco porque dicíen que de les coses males nun s’enteraba, que nun-y les cuntaben los que lu rodeaben. Probe Obama, igual ye un problema de desinformación, pero él «progre» ye.
Too esto ocurrióseme amirando les imáxenes de la tele y viendo’l tratamientu periodísticu del viaxe. Inclusive «El País» falaba del «ésitu» de Rajoy. ¡Ai, qué falta nos facía otru Pablo San José na prensa! Tendría trabayu asgaya.
