close
¿El record de Messi? Que nun fadien…

¿El record de Messi? Que nun fadien…

2014-11-24MessiRecord de Zarra699Visitas

ZarraYá veníen «roncándonos la pata» dende va un tiempu cola inminencia de que’l xugador del Barsa, Messi, diba a batir el famosu record de goles de Zarra na Lliga Española. Nun lo facía un domingu, y había qu’esperar al siguiente. Y asina hasta tres o cuatro partíos que quedó en blanco. Agora, a la fin, nesta última xornada dicen que lu batió, y la xente aplaudió muncho, y los periódicos pónenlo con lletrones gordes, y los compañeros pararon el partíu pa «mantealu». Too mui bien y muy guapo.

Pero si les cuentes s’interpreten como tien de ser, el tal record nin se batió, nin yá va a poder batilu el propiu Messi. Y ye que’l gran Zarra, l’ariete del gloriosu Athletic de Bilbao, aquel de Iriondo, Venancio, Zarra, Panizo y Gaínza, marcó en 277 partíos de la Lliga, 251 goles. Esi ye’l record qu’hai que batir. Y Messi, en 277 partíos de Lliga nun los marcó, necesitó 289 partíos pa marcar los mesmos goles que Zarra, o seya, doce partíos más. Nun tien mayor méritu que llueu, como Messi sigue entovía xugando al fútbol, siga marcando goles. Anque metiere un solu gol por temporada -que nun ye’l casu-. Pero’l record del delanteru bilbáinu fue meter esos goles en menor númberu de partíos ye, pues, un asuntu de porcentaxe, non de cifres absolutes puesto qu’agora xuéguense munchos más partíos por temporada, ye llóxico marcar más goles.

Asina que, ensin querer quita-y nengún méritu al bon xugador arxentinu, el record de Zarra sigue vixente pa que dalgún otru seya a batilu. Unu que meta en 277 partíos de Lliga esos 251 goles qu’él marcó. Dende llueu, Messi yá tuvo la so oportunidá y nun lo consiguió. Agora yá ye tarde.