Tábemos duldosos de si, el primer discursu del nuevu Rei Felipe VI, yera pa toos o namás pa unos cuantos. Emplegó la llingua común de tolos que convivimos n’España, pero esperábemos que, al final, mandara un saludín, una especie de «guiñu», a los que componemos paises distintos dientro del Estáu. Felipe amagó, y saludó a dalgunos (catalanes, vascos, gallegos…) pero a nosotros los asturianos nun nos saludó. ¿Qué feo, non? Porque él tien que saber, inclusive pola so muyer, que los asturianos tenemos tamién una llingua propia. Una qu’usamos pa les coses más íntimes, más carnales, más entrañables, y qu’agora, va tiempu, tamién pa les coses de la nuestra sociedá. Igual nun s’alcuerda de que l’últimu añu que vieno al Campoamor había fuera una pancartina que ponía: ¡¡FARTONES!! Pues esa ye la nuestra llingua. Anque, agora que lo pienso, igual fue por eso polo que nun nos saludó. Pero bueno, ho, nun hai que se poner asina. Dicíase cola familiaridá con que lo emplegamos perequí: «Neñu, nun seyas tan fartón que va a sentate mal». En fin, el casu ye que nun nos reconoció nel so discursu, d’ehí lo que pongo de que ye’l Rei d’unos cuantos.
En cuantes al conteníu de lo que-yos dixo a los otros, a los que sí reconoció, pues tampoco ye que tuviere muncho que destacar, a nun ser el quedase, como siempres, nos grandes principios xenerales que poco dicen: «Hai que ser bonos». Claro, hai que selo. «Nun hai que defraudar a Facienda». Ta bien, díga-ylo a la so hermana. «Tamos acabando la crisis». De xuro que pa elli ta acabando, si ye qu’empezó dalgún día. «Hai que finar col paru». Sí, tamos d’alcuerdu. Hai que finar. ¿Y entós…? Y llueu hai dalgún periodista faltosu que diz: «Qué bien conoz el Rei los problemes de la calle». Rises de fondu.
Por too ello, cuasi prefiero los discursos del anterior Rei, el que fue a cazar a Tanzania (o onde fuere). Polo menos tabes sollerte a ver cuando s’enquivocaba y podíes apostar cola familia. En fin, un discursu más y un añu menos. Pues sí que principiamos bien les Navidaes…
