Cuando un s’encegola demasiao nun tema, cuando la racionalidá da pasu a la roxura y se faen les coses ensin la debida medida, pue finase faciendo’l ridículu. Eso ye, al mio xuiciu, lo que ta pasando cola Universidá d’Uviéu no que cinca al tema de la Selmana Negra.
Podemos tar d’alcuerdu nel rechazu a dichu eventu (motivos hailos abondo), y podemos, sobre too, refugar el llugar escoyíu pa facelu esti añu, al marxe de si los terrenos son de titularidá municipal o universitaria. Pero dicho esto, la descomanada actuación del señor Rector de la docta casa, primero poniendo murios alredor de la Escuela de Marina Civil, y agora cortando’l tráficu que trescurre ente’l barriu de Viesques y l’Hospital de Cabueñes, utilizando pa ello a guardies de seguridá, llenda yá col ridículu. Tal paez una «pataleta» del señor Rector de la docta casa, como la que garren los neños pequeños cuando-yos quiten un xuguete.
El señor Rector de la docta casa tenía (y tien) la promesa de la nueva alcaldesa, señora Moriyón, de que nunca más diba a repitise nesi llugar la Selmana. Pero que, por premura de tiempu, esti añu, como mal menor, habría que la cellebrar ellí. Un argumentu y una promesa suficientes pa dase por contentu, dexando llantao (como asina se fizo) la disconformidá por escrito. Pero esa «guerra santa» de llevantar muries, como en Berlín o en Palestina, y esi corte de les comunicaciones ente una zona superpoblada y llugares tan d’obligáu cumplimientu como un hospital, un tanatoriu, un centru de minusválidos síquicos o la propia Universidá Llaboral ya paez escesivo. Too ello, amás, emplegando unes perres de les que la docta casa ta mui necesitada, qu’hai facultaes nes que nun s’arreglen les
persianes por falta presupuestu.
Cuido que too esto, por esi efeutu d’aición-reaición, nun llevante más problemes que los que yá hai, pero ye fácil cayer en provocaciones por dambes partes. Habrá que tar sollertes. Y nada digo de la llamentable actuación de la Casa Conceyu que, como’l tema ye «heredáu», dan por bones unes actuaciones rayanes nel orde públicu. Asina nun se gobierna, porque’l «patu» pagámoslu los ciudadanos. Vese que tán entovía mui verdes y too esto quéda-yos grande. en fin, siempre s’aprende.
Asina que, llamento tener que dicilo d’una persona que, n’otros ámbitos de la vida, tien demostrada la so valía. Pero nesti tema, el señor Rector de la docta casa, metió la pata «hasta’l cuezu».
