La conseyería de Cultura del Principáu d’Asturies ta emprimando los trámites alministrativos pa denomar a 12 texos espardíos pela xeografía asturiana, «llugar históricu». Ye ésta una figura recoyía na Llei de Patrimoniu Cultural, hasta agora ensin utilizar, y supón na práutica dar una proteición, un abellugu, a esos árboles milenarios tan arreyaos a los vezos y tradiciones astur-celtes. La llocalización d’estos texos, asociaos tamién a les ilesies onde tán llantaos, van del conceyu de Sieru a Allande, de Ayer a Bual, de Balmonte de Miranda a Cabrales y asina hasta los 12 incluyíos nel proyeutu. Esta sedría, en tou casu, una primer actuación un poco como d’amuesa, pues son pernumberosos los texos que s’alcuentren per tol país y que tamién necesitaríen proteición. Na páxina web de los «amigos del texu» tienen recoyíos 246.
El texu yera l’árbol sagráu de los astures siguiendo la tradición celta. Suponía, dafechu, el raigañu del pueblu cola tierra, la so vinculación sagrada a lo llargo’l tiempu. Tien, tamién, otra cara más ténebre pues ta rellacionáu cola muerte, y caltienen les vieyes lleendes que los antiguos guerreros de los pueblos astures preferíen envelenase coles sos fueyes, que cayer en manes del enemigu y ser esclavizaos. Lo que sí sabemos de xuro ye que van xuníos a delles formes de cultu y que la ilesia católica, como fizo con tantes otres coses, edificó ilesies en munchos d’esos llugares de cultu paganu aprovechando les antigües creyencies populares.
Pero quiciabis lo más interesante qu’aportó hasta nós, fue que delantre’l Texu se cellebraben los Conceyos Abiertos,
onde’l pueblu s’aconceyaba pa tratar tolos asuntos importantes que teníen constituyéndose, entós, en símbolos d’entendimientu y respetu ente la xente.
Ye curioso que toes eses persones tan esmolecíes pola cultura d’Asturies, y que se ponen de pates en favor del Niemeyer, la Llaboral o el Xovellanos, guarden silenciu delantre d’esti importante fechu cultural y nun lo resalten como merez. Porque ye ciertamente d’interés la programación d’esos centros culturales, y quién lleve les riendes de los mésmos pero, home, les tradiciones d’un pueblu, el so folklore, les sos lleendes y mitoloxía ye una herencia tan importante que tendría de rebalgar penriba de toes eses otres manifestaciones culturales. Y eso merecería un reconocimientu más públicu.
