Anque toi fuera d’Asturies lleí per internet dalgunos comentarios de xente que siempre me prestó lleer, como Pedro de Silva o Alicia Álvarez, en rellación coles publicitaes (¡qué suerte!) declaraciones del cantautor catalán Albert Pla. Ellos dos, y dellos más, caltienen la opinión de que la xente tien mui pocu sentíu del humor porque asina yera cómo había que tomar les sos «charranaes». Bien, ye una manera de velo. Pero si hubiéremos fecho eso y, al sentir falar a Pla nos hubiéremos escacharrao de risa colo del «asco» y lo de los «cojones», toi seguru del enfadu del catalán porque lo que dicía nun pretendía ser una «humorada». Nun lo dicía pa que nos riéremos. Lo de Pla yera, y ta nel so drechu de facelo, una provocación fecha a posta. O seya, pa que lo tomáremos en serio y nos enfadáremos. Nun quería les rises, sinón l’enfadu, lo que pasa que la cosa se-y fue de les manes/ pallabres.
El sentíu del humor, na mio humilde opinión, ye dalgo que tien que ser compartío col nuestru interllocutor. Tien d’haber una cierta complicidá del que fala col qu’escucha. Lo que se diga, por crítico que seya, tien que facer reir a dambes partes, o seya, hai que se reir «con ún», non «de ún». Otra cosa ye’l «sarcasmu» que resulta muncho más inmisiricorde. En cualquier casu nengún de los dos tien nada que ver cola «provocación». El sentíu del humor busca producir nel otru un mínimu d’aceptación, anque nun se comparta. La provocación, por contra, busca producir el rechazu. Esi ye’l so oxetivu final.
Cuando dalgunos chistosos europeos ficieron caricatures d’Ala, los musulmanes nun lo tomaron como «sentíu del humor», sinón como «provocación». Nun esistía esa complicidá de la que falo ente l’emisor y el receutor. Y si los chistosos europeos queríen dir de simpáticos, enquivocaron l’interlocutor lo cuál costó bastante sangre. Pero esto nun ye nuevo. Munchos artistes de toles époques «vendieron» el so arte pente medies de la provocación, ye dicir, produciendo nel interllocutor el rechazu como mou de llamar l’atención. Recuerdo que, va yá munchos años, Ramoncín nos sos conciertos tiraba güevos al públicu. Non porque tuviere sentíu del humor, sinón porque quería provocar. Podríen citase munchos exemplos d’artistes plásticos, Dalí ensin dir más lloñe. Lo mesmo asocede na política. Les moces de «Femen» nun salen enseñando los pechos por sentíu del humor, sinón por provocación. Busquen producir el rechazu como mou de publicidá pa la so causa y, nidiamente, consíguenlo. Quiciás l’escritor más provocador que conozo ye Arrabal, que siempre arma l’espectáculu coles sos declaraciones. Esti día lleía en La Nueva España’l cabréu de la xente del pueblu asturianu de Poo porque una, vamos llamar artista, fizo una perfomance poniendo veles nel cementeriu enriba les tumbes y faciendo babayaes per mediu d’elles. Al personal paeció-y fatal y l’artista disculpóse diciendo que nun trataba d’ofender.
Nesa llinia, yo entiendo que don Albert Pla nun quixo mostrase simpáticu, asoleyando’l so sentíu del humor, que más o
menos podríemos compartir, sinón que dixo lo que dixo por provocar y que lo que quería yera que nos enfadáremos porque eso, como vimos, «da xuegu». Ye una publicidá gratuita. ¿Hasta ónde quería llegar don Albert, hasta la suspensión del espectáculu? De xuro que non, pero hai que cuntar tamién con que la provocación hai que la pagar, como la paguen les neñes de Femen que se xueguen dir a la cárcel o la pagó Arrabal al que la xente terminó teniendo por un «mexanís» mediu chifláu. Y asina, dalgo que pa min nun tenía nenguna importancia, pa otros supunxo la suspensión del espectáculu. Pero nun ye por falta sentíu del humor, sinón porque nun-yos gusten les provocaciones.
