close
El Sporting, de copes

El Sporting, de copes

2015-12-04Copa del ReySporting240Visitas

Sporting CopaVa yá un tiempu, años, en que l’equipu representativu de la ciudá, el nuestru Sporting de Xixón, paez dispuestu a tirar, esi campeonatu tan guapu y de tanta solera como ye la Copa de España o Copa del Rey, pela borda. N’efeutu, enantes de qu’esistiere la Lliga de Fútbol y la fórmula d’enfrentase toos contra toos a doble vuelta, yá esistía la Copa d’España (1903). Esos enfrentamientos ente dos equipos -a un o a dos partíos- que van produciendo eliminaciones hasta llegar a una Final ente los dos meyores. La competición del K.O. la llamaron, porque siempres dio grandes sorpreses y eliminaciones de los equipos más poderosos por otros más modestos. El modelu más prestosu ye’l d’Inglaterra, onde les eliminatories xuéguense a partíu únicu, na cancha del equipu más modestu. Asina ye como realmente resulta un espectáculu apasionante onde un pequeñu pue arrequexar, y derrotar, a un grande a la vista del so públicu. Equí n’España, cola dictadura de los equipos gordos y les televisiones, faen una mecia de sistema que-y quita la mayor parte la emoción. Como toos sabemos, nes primeres eliminatories, con equipos de Tercera, Segunda B y Segunda, xuéguense a partíu únicu, pero ¡ay amigu!, cuando entren los de Primera cambia la cosa y ya se-y da al poderosu la posibilidá d’enderechar l’entuertu, casu de que se produxere. Nun vayamos a estropiar “el partíu del añu”

Yo recuerdo de la mio época de sociu, na mocedá, qu’al Sporting dábase-y bastante bien la  Copa y tengo vistoQuini azulgrana eliminar a equipos más fuertes -inclusive al Real Madrid- aún siendo a doble partíu. Y nel rellumante historial del equipu, xunto a un segundu puestu na Lliga, figuren dos finales de Copa que perdimos ante dos grandes: Barcelona y Real Madrid. Por  cierto, cuando perdimos escontra’l Barsa, el partíu desequilibrólu el nuestru gran Quini, que xugaba col equipu azulgrana, y metiónos el segundu gol previa falta a un centrocampista xixonés que lu dexó solu delantre’l porteru. Quiero muncho a Quini, pero aquello nun se  m’escaez. El mayor apreciu pola Copa tienlu l’Atlhetic de Bilbao al que siempres se-y dio muy bien, hasta tal puntu que se decía que la final xugábenla siempres l’Athletic de Bilbao y otru equipu. Yo tuvi la suerte de ver una final en Chamartín, que me llevó mio padre cuando yera mui neñu (creo que en 1957) nel que s’enfrentaben el Atlhetic y el Real Madrid de Di Stefano y Gento. Ganaron los vascos por 2-0 y marcó los dos goles Arieta, un delanterón fuerte y rematador que tenía l’Atlhetic (nun confundir con otru Arieta qu’hubo munchu tiempu depués que yera un filimiques).

Con tou esti  rollu quería llegar a dicir que ye una pena que’l nuestru Sporting renuncie yá de mano a una competición tan guapa, unviando a un grupu de reserves a sacar les castañes del fornu. Abelardo diz que ye pa probalos y que se reivindiquen. Bueno, pa eso tán los entrenamientos y los amistosos, les competiciones hai que las xugar en serio, colo meyor que se tien, que presumimos de guah.es de la cantera y llueu tenemos mieu de que se nos cansen. Veo al públicu de Xixón, y a la prensa mui resignaos con esti tema, pero a min paezme que debería dáse-yos un toque d’atención a los téunicos pa que se tomen esto en serio. Nunca se sabe hasta ónde se pue llegar y la xente quier pasalo bien y tener una compensación de los sinsabores de la Lliga. Que van ser munchos.