Esi fue un de los «cariñosos» nomatos que se-y punxeron a Adolfo Suárez por parte la oposición, cuando yera Presidente del Gobiernu. L’autoría d’ésti, en concreto, correspuende a don Alfonso Guerra que-y lu soltó, dende la tribuna d’oradores, allá pel añu 1980. Y añadió: «con un chalecu floreáu». Y ye que don Alfonso nunca nun tuvo pelos na llingua y, dacuando, tampoco vergoña.
Acaba morrer don Adolfo Suárez y pasa con elli una cosa mui curiosa. Y ye que, talo que diz la conocida frase fecha: «ente toos la mataron y ella sola se morrió», porque a don Adolfo, la verdá ye que lu mataron (políticamente) ente toos. La oposición, que fue inmisericorde con elli. Los militares, que lu odiaben a muerte. Los obispos, que lu queríen escomulgar polo de la Llei del Divorciu y otres coses más y, sobre too, los del so propiu partíu. Los suyos, que lu vendieron y traicionaron como un Xudes Iscariote, por unes monedes polítiques. ¡Ah! Y el Rei, que según cuenta Javier Cercas en «Anatomía de un instante», echó lleña en tou aquel enguedeyu del 23-F pa descabalgalu del poder, anque llueu, cuando yá nun yera naide na política, tamién-y fizo declaraciones d’amor.
Nun puedo dicir que’l señor Suárez fuere un gran santu de la mio devoción. De fechu nunca lu voté. Pero si quiero dicir, y digo, que fue un personaxe necesariu pal pasu d’una dictadura que llevaba yá cuarenta años, a una democracia, con tolos matices que queramos poner. Y digo «necesariu» anque, claro, non «suficiente». Otra muncha xente, de parte y parte, collaboró en qu’esi cambiu se ficiere ensin violencies, si quitamos a la ultraderecha, al Grapo y a los «amigos» de la ETA, esos lluchadores, esos «gudaris», qu’a puntu tuvieron de consiguir lo que queríen: otru golpe militar qu’acabare cola incipiente democracia. Munches docenes de militares y políticos asesinaron pa provocar esa rempuesta del exércitu, y a puntu tuvieron de consiguilo. Se conoz que’n dictadura movíense meyor.
Suárez fue, ante too, un home pragmáticu. Fizo lo que tenía que facer… daes les circunstancies del país. Podría dicir que fizo lo que «pudo» facer, pero creo que sería inxusto dicir eso: fizo daqué más de lo que pudo, forciando les coses pa que pudieren funcionar. Diz «El País» que fue’l presidente que más defendió los pactos: nun tuvo otru remediu. O pactaba hasta col Diañu, o la cosa nun diba p’alantre. Nun voi entrar en los sos llogros porque agora tola prensa, la tele, la xente de la cai y los políticos falen d’él como si siempre-y tuvieren reconocío los sos méritos. Tolo contrario. La prensa lu criticó, y los políticos de tolos signos ensañáronse con él. Agora naide quier reconocelo. Pero como se diz nestos casos, ehí tán les hemeroteques pa miralo. Morrió d’una enfermedá qu’aislla a la xente, pero Suárez, en realidá, tuvo siempre aislláu. Morrió solu, talo que finó la so carrera política: solu. Anque agora, los «tahures del Misisipi» quieran facenos creyer que siempres lu quixeron muncho.
