Vi un cachu del famosu debate ente los señores Rivera ya Iglesias que dio l’otru día la Sexta. Tuvo entreteníu, anque nun se dixo nada nuevo. Paecióme que s’atopaba más cómodu Rivera, y paecióme tamién qu’Iglesias, que tantu mieu mete a dalgunos poles sos posiciones estremistes, quixo apaecer como «suavín» y moderáu dientro, claro, de nun renunciar a delles conocíes posiciones. Dende llueu’l cabezaleru de Ciudadanos -don Albert- nun pretende modificar el sistema, sinón apuntalalu, corrixendo dalgunos escesos que se dan, mentanto que’l de Podemos -don Pablo- paez decidíu a afondar más dafechu nes contradiciones que’l capitalismu trai consigo. Otra cosa ye que pudiere facelo.
En cualquier casu, el verdaderu ganador del debate fue un periodista pequeñucu que los contendientes teníen en medio, y que lleva por nome Jordi Évole. Él fue’l trunfador de la nueche axuntando a dos políticos mozos, entovía ensin «gastar», y propiciando un palique civilizáu, una especie de conversación de café (d’ehí l’entornu que buscó), na que quedaron fuera les tensiones, los malos moos, les entrugues preparaes, les contestaciones de «pata bancu» o, cenciellamente, inesistentes cuando nun interesa dales… Too trescurrió cuasi diría que «amistosamente», porque pa defender unes postures y criticar otres nun fai falta ponese como fieres, insultar o descalificar al opositor. Évole, dexó falar cuando correspondía, cortó cuando yera menester y encarriló’l debate con soltura y bon humor. Nada que ver con eses fórmules «envaraes», con esos contendientes enfocicaos, con esi tastu de qu’aquello ye lo de siempres y que, poro, nun t’interesa un res.
Quedamos, entós, a la espera de nueves iniciatives del señor Évole, que de xuro que vendrán y, mentanto, felicitámoslu por so bon facer y, sobre too, por axudar a desdramatizar una actividá, la política, que paez que siempres ta al filu de la traxedia griega. Pero en plan «chusco», claro.
