Ye curioso cómo los editores cataloguen a los sos llibros, a los qu’ellos publiquen, n’una o otra coleición según el xéneru al que quieren que perteneza. Asina, a esta novela, «Elena sabe»de l’arxentina Claudia Piñeiro -Burzaco, Arxentina, 1960- encuádrenla nel xéneru «novela negra, intriga y terror». Asocede, entós, que parte de los llectores y dalgún qu’otru premiu de los que regalen perehí creen que ye verdá lo del xéneru y concéden-y, como nesti casu, el Premiu Pepe Calvalho de Novela Negra. Con tolos mios respetos, nada nun ta más lloñe de la realidá, porque «Elena sabe» tien de novela negra lo que yo de monxa de clausura, o seya más bien «na de na».
Y ye qu’un nun pue dexase engañar por esos estereotipos que s’estracten del argumentu, como bonsais que pretenden esplicar cómo ye un árbol grande. Una madre, que carez la enfermedá de Parkinson, nun cree que la muerte de la so fía fuere un suicidiu y quier saber lo que daveres-y pasó. Ye nidio que, con esti filu, pue escribise una novela negra y una de terror, pero tamién una d’humor negro o una costumista. Asina, l’anéudota del suicidiu queda nun segundu (o tercer) llugar porque, en realidá, lo que nos cuenta Claudia Piñeiro ye la resistencia (¿resiliencia?) d’una muyer yá mayor, a una enfermedá que podría inhabilitala, pero a la que se resiste con una tenacidá y un querer vivir dignos de eloxu. Asina, el llector sufre con Elena la dificultá de mover los pies, porque’l celebru nun ye a manda-yos la orde precisa, o si-yos la manda ésta nun aporta al so receptor. Hai qu’esperar pola pastiella necesaria pa que la cosa funcione. Y depués tenemos namás dos hores pa, mui sele, movenos per un escenariu inhóspitu: calles, estaciones, trenes, un taxi onde quedamos tiraos sobre l’asientu porque nun podemos tar derechos… Y too eso cuéntalo perbien l’autora, mentanto la nuestra mente (la d’Elena, claro) recuerda la so rellación con Rita, la fía, cola que siempres se llevó mal, porque Rita ye una persona negativa anque tenga razones pa ello. Tener que curiar de so madre inútil ye una d’elles.
Y el llector tamién acaba avezándose a mirar el mundu de mediu cuerpu pa baxo, como ye la mirada de la muyer, a la que la enfermedá nun dexa llevantar la cabeza, y namás que ve piernes, pantalones y zapatos que, a veces, válen-y pa xulgar a les persones. Esi mundu llimitáu, que vemos colos güeyos d’Elena, ta xenialmente recoyíu por l’arxentina, con un llinguax cenciellu pero aceráu, lo mesmo que los escasos diálogos que tien la novela, onde rescamplen les conversaciones que caltién col policía a cargu la investigación y col cura párrocu de la ilesia onde s’aforcó la fía. El percorríu físicu de la protagonista fina en casa d’un personaxe que ye en quien ella confía pa que pueda ayudala. Poro esi final va a ser una esplicación pa les esmoliciones d’Elena y tamién del espectador que l’acompaña nesi viaxe urbanu. Y a la fin entiéndelo too y nosotros tamién. Y la «novela negra» pierde’l so nome y queda al altor que siempres tuvo: una novela de sentimientos, de sufrimientos, de vida corriente como la que lleva muncha xente de la qu’abeya al nuestru llau, ensin que nos enteremos. La cenciellez d’una mui bona narradora como ye l’arxentina Claudia Piñeiro. Felicitaciones.
«Elena sabe»
Claudia Piñeiro
Ed. Alfaguara
2006-Reed. 2019
