close
Escursión col Atenéu

Escursión col Atenéu

atapuerca (1)Como tolos años, cumplimos el gayoleru  ritual de facer un par de viaxes col Atenéu Obreru de Xixón: un pa la primavera y otru pa la seronda. Nesta ocasión fuimos a conocer Atapuerca, el Muséu de la Evolución Humana, y la esposición de Les Edaes del Home que se cellebraba n’Aranda de Duero. Talo que siempres, la organización fue exemplar, con tolos detalles d’agospiu, entraes, guíes y demás elementos, perfeutamente amestaos y coles informaciones importantes nuna carpetina mui completa.

N’Atapuerca la verdá ye que nun hai muncho que ver. Emociona un poco saber qu’ellí hubo restos de los nuestros remotos antepasaos (dalgún entovía anda sueltu per Asturies), pero ellí lo únicu que pue vese son los estratos onde fueron apaeciendo los restos, eso sí, mui bien numberaos y clasificaos. Suplió muncho’l Guía, un de los arqueólogos de la escavación, que tuvo simpáticu, ocurrente y mui didácticu. Gracies a elli pudimos facenos una idea, in situ, de la vida y la muerte d’aquella xente primitivo. Los afayos importantes taben nel Muséu de la Evolución Humana, en Burgos, un edificiu mui curiosu y colos espacios mui bien diseñaos. Aprovechamos perbién la visita.

La ciudá de Burgos tenía un ambiente enorme, y ye qu’esti fin de selmana cellebrábense unes fiestes n’honor del Cid Campeador, que polo visto yá son tradicionales d’otros años. Ellí too yera «cidano», hasta un menú qu’había común pa dellos restaurantes. La verdá ye que yo nun tengo en muncho aquello al famosu Rodrigu Díaz de Vivar, que siempres me paeció un «mercenariu» que vendía la so espada al meyor postor, fuera moru o cristianu, y aún asina podía terminar engañándolu. Pero bono, nunca ta de más tener simboloxíes propies, anque seyan un poco «inventos del TBO». El casu ye que cuasi nun podía andase peles cais onde, amás, ca poco pasaba un desfile de «caballeros» vistíos con traxes de la Edá Media, y los pendones ximielgando al aire. Too mui bien presentao y curioso, anque pal mio gustu demasiao barullu.

La esposición de les Edaes del Home nun fue de les meyores de la so categoría, mui por baxo de la de LLión, Salamanca o Ciudá Rodrigu, peroEucharistia siempres hai coses interesantes que ver. El títulu xeneral yera «Eucharistía», y dalgunes coses taben un poco garraes polos pelos. Cualquier retablu, cuadru o escultura taba rellacionáu col tema… anque nun lo paeciera. Lo meyor, al mio xuiciu, lo bien qu’encaxaron dalgunes obres d’autores contemporanios dientro del mundu relixosu antiguu. Fueron poques, pero bien escoyíes.

Hubo tamién una visita a unes Bodegues Medievales, una red de túneles asitiaos a más de diez metros baxo tierra, que percorren gran parte de la ciudá d’Aranda. Ellí la muyer y yo nun baxamos, bien conocida la nuestra mundial claustrofobia. Pero, eso sí, llueu participemos de la Cata del vinu de la tierra, el famosu Ribera de Dueru, que saborguiamos xunto col restu la espedición. Y ye que nun tien que ver una cosa cola otra. Y asina finó esti prestosu viaxe del Atenéu, quedando a la espera del siguiente, allá pa la prósima primavera. Yá vos cuntaré.