Títulu: «Diario de una buena vecina»
Autora: Doris Lessing
Traductora: Marta Pesarrodona
Editorial: Santillana. Col. «Punto de lectura»
Añu: 2007 (1ª Edici. 1983)
De magar que-y dieron a la escritora inglesa el premiu Nobel de lliteratura, nel añu 2007, les editoriales que teníen los drechos d’autora principiaron a reeditar y esparder los sos llibros. Coses del márketing. En cualquier casu, siempre ye bon momentu pa lleer o relleer los llibros d’esta notable escritora que, ensin da-y muncha importancia a premios nin homenaxes, sigue escribiendo histores humanes que siempre conmueven y fain pensar.
Esti diariu d’una bona vecina ye eso, un diariu escritu por una muyer entovía xoven y atrautiva, pero empezando yá a entrar nesa media edá que tantu mieu da a homes y muyeres. Esa edá na que qu’un se plantega que quiciás yá nos va quedando más vida per detrás, que per delantre.
Janna, esa muyer qu’escribe’l diariu, pese a ser viuda, tien una vida estable y socialmente de rellumu, dende’l puestu de subdireutora d’una revista de moda. Ensin embargu, la so propia actitú ante la enfermedá y el fallecimientu del so maríu y de so madre, actitú de distanciamientu, como queriendo fuxir d’esi «andaz» que representa la muerte, dexáron-y un posu de mala concencia que necesita dir afogando. Poro, l’alcuentru casual con Maudie, una señora mui mayor y probe, que vive d’alquiler nuna casa vieya y húmeda, al borde mesmu del síndrome de Dióxenes, da-y ocasión a Janna pa, venciendo tolos escrúpulos, primero axudar y llueu facer amistá con ella.
D’esi mou, el llector va enterándose de les circunstancies que llevaron a Maudie a esi estáu de probitú y abandonu, al tiempu que conoz el mundu onde se mueve Janna, y la so relación con Joyce, la direutora y amiga de la revista. Muyer de la so edá y clas social, que ta atravesando un momentu familiar mui delicáu. Del tratamientu d’estos tres personaxes, naz la historia, fonda y triste, onde abunden les reflexones sobre la vieyera, la muerte y l’abandonu d’eses persones «invisibles» qu’abeyen pel nuestru llau.
Como siempre, Doris Lessing nun defrauda.
