close
«Ex libris»

«Ex libris»

2010-05-06858Visitas

figura-de-llectorTítulu: «Mio ma, la pirata»mio_ma_la_pirata

Autora: Iris Díaz Trancho

Dibuxos: Gloria Caamaño

Editorial: Suburbia Ediciones

Añu: 2010

UNA BONA MUESTRA.- Caltengo la opinión, y asina lo tengo dicho munches veces, que la lliteratura infantil y xuvenil asturiana ta pasando per un bon momentu. A la bayura d’autores, con nueves incorporaciones tolos díes, xúnese la calidá de los dibuxos y la perestimable presentación editorial. A les yá tradicionales, como Trabe, amiéstense otres nueves con un peraltu nivel de calidá, casu como’l de la exemplar Pintar-Pintar, capitaniada por Ángela, Ester y Carlos y, agora, Suburbia, que recién acaba inaugurar una nueva coleición infantil llamada «Camín de Bree», cuyu primer títulu ye, precisamente, esti del que toi yo escribiendo.

Iris Díaz Trancho ye, pese a la so xuventú, un de los meyores valores de la lliteratura asturiana d’anguaño. Y nun sólo na lliteratura pa los más pequeños, onde yá lo tien demostrao con obres como «La caxa de cristal» (premiu de l’Academia) o «La neña de les trences al revés», sinón mesmamente en tola clas de lliteratura, con unos cuentos curtios que xunten fondura temática y calidá lliteraria. El prestixáu concursu de cuentos de l’asociación «El Garapiellu», que ya tien ganáu, ye una bona amuesa d’ello.

En «Mio ma, la pirata», Iris saca la so imaxen más «gamberra», y con un sentíu del humor na llende del «non sense», cuéntanos la historia d’una estraordinaria pirata a la busca d’un tesoru… lliterariu. La narración ta «trufada» de continos golpes d’humor y per ella pasen un Barba Negra que tien un restaurante, un Barba Roxa que se fizo xastre y otros pirates africanos qu’entamaron una cooperativa d’agricultura nuna islla del Pacíficu. Hai grupos musicales que se llamen «Andariques Xabaces», y festivales de música como’l Bucanero’s Rock o’l Filibustock. El protagonista, so ma y la perra Pulga, ponen un migayín más de «desorden» en tou esi baturiciu, faciendo de la llectura de «Mio ma, la pirata» dalgo superprestoso.iris-y-deva

Per otru llau, los dibuxos de Gloria Caamaño nun queden atrás del conteníu del textu. Unos dibuxos de calidá, enllenos de coloríu y espresividá, que demuestren l’altu nivel de los nuestros dibuxantes y que complementen perfechamente esti album que recomiendo encesamente, y nun sólo pa los neños, sinón tamién pa los mayores que, como yo, esfruten con una historia simpática y bien cuntada. Norabona, pues, a la editorial Suburbia por esta nueva coleición que nun podría principiar meyor. Y agora a enfrascase na llectura d’un textu qu’empieza asina:

-Mamaaaaa! ¡Nun metas les banderes pirates cola ropa blanco-glayé dende la cubierta’l barcu, onde una riestra de ropa desteñío diba y venía col airón de la mar…

Leave a Response