Títulu: «Aquella edad inolvidable»
Autor: Ramiro Pinilla
Editorial: Tusquets
Añu: 2013
UN DRAMA FUTBOLÍSTICU.- Ramiro Pinilla ye un veteranu escritor vascu (Bilbao, 1923) que conoció un empiezu rellumante ganando dellos premios, ente ellos el prestixosu Nadal con «Las ciegas hormigas» nel 1961. Depués cayó nun trupu silenciu hasta que, yá va pocu tiempu, volvió a dexase lleer con una interesante triloxía «Verdes valles, colinas rojas» que lu llevó a ganar el Premiu Nacional de la Crítica y el Nacional de Lliteratura. Escritor sólidu, amiesta seriedá y costumismu nunos testos que cinquen siempre a la so patria vasca.
La so última obra ye ésta que reseño y qu’acabo de lleer. Un drama sobre’l mundu del fútbol nel qu’un rapaz namoráu dende pequeñu del «so» Atlhetic de Bilbao, ve cumplíu’l so suañu fichando pol equipu de los sos amores y marcando un gol nuna final de la Copa del Xeneralísimu, namenos qu’escontra’l Reaal Madrid, dándo-y el trunfu a los blanquirroxos. Poco-y dura l’allegría suya y de la familia, porque nel primer partíu de la siguiente temporada, una entrada asesina d’un defensa contrariu apártalu, nun sólo del fútbol, sinón tamién de la vida, dexándolu con una pierna inútil y una coxera permanente.
Tolo que vien depués, ye un drama personal y coleutivu (sos padres, la moza, la xente del barriu y del pueblu -Getxo- que lu arrodia…). El fundimientu del rapaz, la so amargura vital, la resignación ante un futuru de murnia y desesperanza, ye retratao por Pinilla con trazu cenciellu y firme regalándonos los más íntimos secretos d’unos personaxes que, como un antiguu coru griegu, muévense ya interactúen en pos del mocín de la obra. La consideración que faigo de «drama», nun quier ser peyorativa, sinón que yá la única que se m’ocurre al filu de lo que socede na novela y, sobre too, de cómo lo vive el protagonista.
Y ye qu’un nun dexa d’encariñase colos personaxes: l’entrañable padre que, yá dende neñu lu acompaña a San Mamés, con esi contáutu cálidu de la so mano; la madre, ausente, enzarrada nun mundu propiu y silente dende la muerte del so otru fíu que nunca llega a superar; la moza, que llucha hasta’l fin por salvar l’amor d’un rapaz que quier fuxir de la vida; l’hermanín d’ésta que lu amira como a un ídolu pesie a la invalidez que lu ayena de too y de toos… Pero cuando paez que yá ta dicha la última pallabra, que la so suerte ta echada, apaez una oportunidá pa él. Namás tien que traicionar el so amor al Atlhetic y dicir qu’aquel gol de tiempu atrás metiólu cola mano. Futuru versus dignidá y amor a unos colores.
La novela ye prestosa y bien escrita. Por pone-y dalgunos reparos diría qu’igual abastaba con un cuentu llargu en vez d’una novela, porque l’argumentu nun daba pa tanto, espúrrese demasiao. Y tamién qu’hai un ciertu maniqueismu nel tratamientu del tema: los bilbainos los buenos, los dignos, los auténticos. Los madrilanos los malos, los corruptos, los del réximen… En cualquier casu son cosines que nun estorbisen el llabor d’un bon narrador como Pinilla que, una vuelta más, fizo una novelina mui entretenida, anque amarga.
