Va tiempu que nun escribo de política nesti blogue. Nun ye casualidá. El grau de degradación qu’algamó “la noble dedicación de la política” llega a tal estremu qu’esti qu’escribe prefier falar de lliteratura, de teatru o de deporte enantes que metese nesa llamuerga a la que nos empobinaron políticos, medios de comunicación, tertulianos varios y hasta’l tenderu de la esquina qu’enantes namás falaba de fútbol. “Ya fiede”, díxo-y la hermana de Llázaru a Xesús cuando ésti diba a resucitalu. A Xesús nun-y dio más, y anque Llázaru llevaba tres díes muertu, mandólu llevantase y caminar (la suerte que tenemos los non-creyentes ye que podemos citar la Biblia ensin que nos llamen fachas). Pienso daveres que’l fíu del carpinteru fracasaría si tuviere que resucitar a la política y a los políticos españoles. Fieden, pero duldo de la so resurreición, llantaos como tán nesa especie de “Sálvame naranxa” o cualesquier otru aborrecible programa de la “Cinco” con glayíos, insultos, cotilleos y descalificaciones. El Parllamentu ye agora un gran escenariu de televisión.
Pero, anque digo eso, vuelvo a falar de política masque seya en clave llocal. Y fáigolo por dos razones: la primera porque cinca a la mio ciudá, na que ñací, na que vivo y na que, si les coses nun cambien, pienso morrer. Y la segunda, porque’l cambiu de posicionamientu de la FSA nel tema del asturianu merez una alvertencia d’una persona neutral (que soi yo) que quier ayudalos. Nun sé si seré oxetivu, pero quiero ser neutral.
Y ye que, los últimos candidatos del PSOE a l’alcaldía de Xixón, nun teníen nenguna categoría como pa ilusionar a los votantes. Xente amorfo, ensin rellumu personal y nula entrada con un pueblu como’l xixonés con un carauter mui marcáu, mui suyu. Los playos, y los que nun somos playos porque nun ñacimos en Cimavilla, sinón nel Centru, L’Arena o cualquier otru barriu de Xixón, tenemos unes carauterístiques que se nos marquen nel sentíu del humor, na “mala llechi”, nes ocurrencias, nos gustos o disgustos y hasta na forma de falar. Hai que saber coneutar con nosotros.
El fechu de querer presentar como candidata a la antigua conseyera de cultura, Ana González, ye pretender facese l’harakiri enantes de les votaciones. En primer llugar pola so procedencia ovetense. Esi ye un tema non menor a la hora de buscar votos y sofitos ente la xente xixonesa. Podía guapamente ser d’Aviles, de Sotrondio o de Vegadeo. Nada d’eso sería invalidante pa optar a alcaldesa d’esti pueblu. Ye más, recuerdo a aquella Pilar Fernández Pardo, madrileña, que tuvo una montonera de votos xixoneses y a puntu de ganar les eleiciones. Pa mandar en Xixón val cualquiera… menos una d’Uviéu. La cosa ye asina, anque pueda prestar más o menos. Pero ye que, amás, esta persona pidió’l treslláu d’un centru de Xixón onde daba clases, pa un de la capital, agravando más la cosa. Y pa lo cabero, el so percorríu pola Conseyería d’Educación y Cultura nun fue precisamente un exemplu bonu de xestión. Dende lo qu’a min me toca, dicir que nunca nun asistió al actu cultural más importante n’Asturies, como y’El Día de les Lletres Asturianes. Creo recordar qu’un añu dio la disculpa de que tenía qu’asistir a una entrega de premios de Judo o dalgo asina, a un grupu de rapazos. Pa facer una Olivina.
En fin, yo pola mio parte cumplo cola FSA pol comportamientu que tienen nel tema la llingua, dándo-yos una opinión al marxe de lluches internes o intereses de parte. Lo qu’ellos faigan agora ya nun ye cosa mía.
