Anden los operarios tovía dando los últimos martiellazos, y la muyer y yo col pelo blanco de la cal (y de los disgustos) pero a lo que paez yá tamos coneutaos col mundu mundial colo que vamos intentar reaniciar aquelles pequeñes perorates que, dicho con llinguaxe franquista, a nada ni naide representen, sacante al dueñu d’esti espaciu. O seya, que vuelve pa gociu de dellos y tristura de la mayoría’l reconocíu blogue “Trabayu de Campu”. TATACHÁN
Lo propio nesti casu sería facer un pequeñu resume de socesos nel mes y picu que tuvimos de folgueta, llabor cuasi imposible pola celeridá con que pasen les coses y la dificultá de recordales ya intentar desbrozales. Apararémonos, entós, en dalgunes d’elles.
La más gorda, claro, la de los atentaos de París que dexaron un regatu de muertos y un tastu d’inseguridá na sociedá europea entera. Les medíes que se tomaron –dalgo había que facer- van na llinia de camudar espacios de llibertá por espacios de seguridá, y declarar la guerra a los que nos la tienen declarada: l’Estáu Islámicu o cualquiera d’esos otros nomes que se-y da. El Presidente Hollande decide bombardear, americanos y rusos manden portaviones y toos s’apresuren –menos Rajoy- a ufiertar cualquier tipu d’axuda a los contritos franceses.
Dos coses salten a la vista (a la mía que ye un poco miope) como reflexón sobre l’asuntu. La primera que la famosa Unión Europea, que pa unes coses ye super-quisquillosa, como too eso de les deldes y los déficits, y hai unes lleis y unos mandatos d’obligáu cumplimientu, en cambiu pa otres, como ye la importantísima política internacional, caún va por llibre. La verdá ye que nesi tema Francia, yá dende los tiempos de De Gaulle, siempre fue por llibre pero, coime, si se ye una Unión Europea ¿nun habría que discutir tamién esos temes y tomar resoluciones conxuntes y non actuar llibremente y llueu que s’apunte’l que quiera? Pues non.
Otra cosa ye la efeutividá que talos ataques aéreos puedan tener. Yo si lo que se pretende ye cortar el grifu a la financiación de los terroristes, bombardeando pozos, refineríes y tresportes d’armes nun lo veo mal, agora si se trata de bombardear ciudaes onde reside población civil (con muyeres y neños incluyíos) y que son población ocupada, non satamente terroristes, toi dafechamente a la escontra. En cualquier casu, ehí, si quieren ganar esa batalla sobre’l tarrén, van tener que mandar tropes terrestres, y eso yá ye más complicao.
Los partíos españoles unos apúntense al carru, del que tira Rajoy, y otros non. “Guerra non”, dizse nes manifestaciones, pero esto ye distinto a lo de Irak, equí na guerra yá nos metieron los terroristes, anque d’aquella povisa vieno esta repla. Si un de los bandos anicia una guerra, l’otru tien dos posibilidaes: o mamales y poner la otra mexella, o responder de dalgún mou… contundente. Y la llista d’atentaos y de muertos va in crescendo.
Lo de los catalanes sigui nun impasse. Esos de la CUP anden un poco como la Parrala, sí pero non, non pero sí. A ver
en qué apara. Pa min que son un poco antisistema de salón, anque l’otru día lleí quiénes la formaben y mete un poco mieu, ente ellos los heriedes d’aquellos terroristes de “Terra Lliure”. Nun sé qué peguen colaborando cola más rancia burguesía catalana. Un de los dos ta echándolo fuera’l bacín.
Y na nuestra Asturies, patria querida, pasó lo que tenía de pasar: un Partíu Popular, eternu perdedor con Mercedines Fernández, pauta con un Foro veníu a menos pola indolencia del so expresidente y fundador señor Cascos. Xunise o esapaecer. Queda’l reductu de Xixón onde yo creo que la Moriyón y Cía tán faciéndolo bastante bien pa lo que yera d’esperar. Lo que pasa ye que, ensin un partíu detrás sofitando, ye pan pa güei y fame pa mañana, como-y pasó al ínclitu Jose Manuel Palacio cuando marchó/lu echaron del PSOE, o al Duque de Suárez cuando pasó aquel esbarrumbe de la UCD.
Y bueno, pa ser un primer día nun tuvo mal. A ver si consigo que marchen los trabayadores qu’entovía abeyen pela casa con calderos, anque seya faciéndo-yos un ERE.
