close
«Friends»

«Friends»

2023-10-31FriendsMatthew Perry608Visitas

Quise esperar unos díes enantes de dicir daqué sobre la muerte d’un de les persones que más entraron na mio casa nos últimos tiempos. Porque Matthew Perry, miembru destacáu de «Friends», acompañábame toles nueches depués de cenar pa que pudiere colar pa la cama con una sonrisa nos llabios. «Friends» ye dalgo más qu’una serie, pa min y pa la mio muyer que lo comparte, ye la recompensa d’un día más o menos duru, el consuelu d’esi dolor que tuvisti, d’esi disgustu que llevasti, d’esi caleyar 24 hores más per esti mundu que tien munches coses bones, pero que desgasta. Que te va ariando. Poder poner enantes de dir pa la cama les pequeñes histories de los seis amigos, los sos dires y venires, el frescor de los sos diálogos, l’actualidá d’unes situaciones que tienen más de 25 años y que te faen sonreir o reir a carcaxaes, nun tien preciu. Too funciona bien, hasta los que faen los doblaxes que cuido que nun se veríen minusvaloraos poles propies voces de los actores.

Siempre hai que llamentar la muerte de cualquier ser humanu, pero nel casu de los actores, de los artistes, quédanos siempre la obra, o l’actuación, aquello que fue en realidá lo que dio sentíu a les sos vides. Poro, nun me da más que fuera de la escena, fuera del pincel, al marxen de la música, la persona real fuere esto o l’otro. Siéntolo por ellos, claro, si tuvieron una vida complexa o nun fueron felices, pero aquello que perdura ye lo que ficieron en rellación a nosotros, al mundu nel que desendolcaron la so actividá de la que participamos. Igual Matthew Perry, como dicen, bebía n’escesu o tomaba tranquilizantes o nun yera afortunáu nesto o naquello. Repito que lo siento por elli. Pero eso nun va quitar nin un rispiu del valor que tuvo pa nosotros la so actuación, xunto colos sos amigos/hermanos de «Friends». Porque cualquiera que ye a contaxar a la xente un gramu de felicidá tien yá, por ello, el cielu ganáu. Y si nun hai cielu, la nuestra eterna gratitú. ¡Gracies, Chandler!