L’otru día, nun típicu/tópicu palique futboleru con unos amigos, dixi lo que digo siempre: que’l fútbol del Barcelona abúrreme más que lleer la guía telefónica, y que de siguir asina, acabarán matando al fútbol. Afirmación tala llevantó un baturiciu d’argumentos en contra, enllenu de títulos, cifres, estadístiques y otres coses d’asemeyáu calter. Nun niego la evidencia, el Barsa ye’l campeón y ye perfácil qu’esti añu vuelva a selo, pero debe ser que yo, que veo fútbol dende neñu, entiéndolu de mou distintu a eso qu’agora ta de moda. Tantu pasiquín, tantu «rondo», tanto masuñar la bola p’alantre y p’atrás, pa llueu facer una «pareduca» o un tú-yo, y si la cosa nun sal da-yla a Messi pa que faiga la diagonal, regatee a media docena y meta gol paezse más a un xuegu «de salón» que a una llucha nun campu de fútbol.
Tol mundu fala estos díes del gran espeutáculu que dieron l’otru día l’ Atlhetic y el Barsa na «Catedral», y lo bien que xugaron dambos. Pero ye qu’esi Barsa nun tuvo nada que ver col que tamos avezaos a ver. La lluvia, l’estáu del prau y el xuegu valiente del Atlhetic impidió a los catalanes facer el «rondo» y el pasiquín, y tuvieron qu’entrar «en combate» porque si non perdíen el partíu. Asina se vio un espeutáculu como «los d’antes», como yo tengo visto cuando, por exemplu, l’añu del Mataxigantes-y metimos 3-0 al R. Madrid, lloviendo, col prau embarráu y una pelea abierta sobre’l tarrén (¡qué gol de Biempica dende 40 metros!). Porque, y voi dicilo yá, el fútbol tien que tar más cerca de «la épica» que del «ballet». Dicen que la «guinda» del fútbol son los goles. Nun ye verdá. Pue dase un resultáu de 1-0 y asistir a un partíu perguapu, disputáu, con llucha, balones llargos y remates a portería. Y, ensin embargu, ¿qué interés tien ganar 7-0, por exemplo, a cualquiera?. Depués de los dos primeros goles aquello ta muerto.
Agora, viéndennos la última táctica del Barsa como un gran inventu: Xugar ensin delanteru centru. ¡Pues menuda
mierda! Eso acaba col fútbol. Lo guapo ye xugar con delanteru centru, con un par d’estremos, con balones centraos al aria, con fútbol rápidu y cambios de xuegu. Esi ye un inventu pa que Messi gane los partíos y lu nomen meyor xugador del mundu. Pero pa llegar a eso hubo qu’emplegar la táctica del «ocalitu». Messi ye l’ocalitu que medra rápido y pue utilizase la so madera, pero a costa de desertizar tolo que lu arrodia. Namás hai que echar una güeyada a los grandes delanteros que tuvo al so llau, y el resultáu que tuvieron. Echaron a Ronaldiño, trespasaron a Etoo, llargaron a Ibrahimovic y agora tán anulando al nuestru gran Villa: El másimu goliador de la Seleición Española de tolos tiempos. Porque Villa, nel Barsa, ye un pión más dedicáu al xuegu y al rellumu de Messi. L’otru día, en Bilbao, tuviéronlu na caseta hasta que l’Atlhetic se punxo por delantre y lu tuvieron que sacar. En diez minutos cuasi marca dos goles. En cambiu Messi, que ye un gran xugador, na Seleición Arxentina, nun brilla tanto porque nun lu dexen facer d’ «ocalitu». Hai otros xugadores, otros valores y otra forma d’atalantar el fútbol. Claro que si lo miramos dende’l puntu de vista «práuticu», al Barcelona ta dándo-y mui bon resultáu y munchos títulos. Pero esi ye otru tema distintu del que yo toi falando.
Y, con too, lo pior d’eso ye que se piensa qu’esi modelu de xuegu ye’l qu’hai que siguir, lo cual va a llevanos a un aburrimientu futboleru infumable. L’amigu Vicente del Bosque (que ye un señor, pero nun tien idea), col meyor equipu de tolos tiempos, va camín de lo mesmo. A xugar ensin delanteru centru, poniendo nesi puestu ¡a Silva! ¡Que nun me toque les narices! Igual pasó ante Suiza que cuasi nos echa del mundial, por poner un solu delanteru. Y el ridículu que ficimos ante Arxentina, Portugal, Italia o Inglaterra, con unos xugadores que son tan bonos que nun necesiten más qu’una persona que ponga a caún nel so sitiu. O ye que, a estes altures, van a enseña-y dalgo a Xavi, a Xabi Alonso o a Puyol…
Lo dicho, nel momentu nel que’l fútbol se separte de la épica pa camudase nun xuegu de salón (y yá ta camín d’ello), podremos cellebrar el so «Requiem» y dedicanos a otra cosa. Anque los catalanes y los que los animen tean mui contentos.