Nunca nun fui a entender del too los temes científicos, nun digo yá a nivel profesional sinón mesmamente al de llector de periódicu. Asina, sigue paeciéndome maxa’l poder tar viendo na mio casa dalgo que ta pasando a miles de quilómetros, y al mesmu tiempu que pasa. Sí, les imáxenes descompónense y viaxen y toes eses coses qu’un neñu de cinco años compriende ensin dificultá, pero qué quies que te diga, sigo ensin entendelo.
Entender, entós, too eso de la «clonación», y de les célules madre, y esi «nivelón» que tol mundu paez tener agora, que fala d’ello como si falare del partíu del domingu, pues quédame un poco «grande». Pero eso nun quita pa que me dea cuenta de qu’eso, y coses como eses son el futuru de la humanidá. Los humanos somos lo que la investigación fizo de nosotros. Dende aquel ocurrente qu’inventó la rueda, hasta los más caberos descubrimientos en melecina, n’aeronáutica o n’alimentación. Si nun fuere por eso qu’agora se da en llamar la «investigación y el desarrollu», entovía andaríemos pelos praos pegándonos garrotazos. Poro, la investigación ye dalgo vital en cualisquier sociedá que quiera dir p’alantre, nun estancase y, penriba too, nun tener que depender de patentes estranxeres que llueu cuesten miles de millones.
Hubo un momentu en que paecía, o paecíamelo a mi, que n’España teníen apostao por lo del I+D. Que se sofitaben equipos d’investigación en fundaciones, hospitales y otros centros científicos, incluyíu, claro, el CSIC (Centru Superior d’Investigaciones Científiques) pero eso debió ser tamién una «burbuya» qu’españó xunto cola de la construición. Españó, desinflóse y desapaeció. Agora, los xóvenes investigadores españoles tienen que colar d’esti país míseru porque los recortes tán afogando’l nuestru futuru. Y asina, mozos y moces espulsaos d’España tán trabayando y trunfando n’Estaos Xuníos, Alemania o otros llugares onde valoren más, o cenciellamente valoren, el so trabayu. Un
trabayu que ye frutu d’una preparación y unos estudios que-yos dimos equí, y esa ye la gran paradoxa y la gran inorancia de los nuestros políticos. Pagamos una formación que llueu van aprovechar n’otros paises. ¿Cabe, entós, mayor despilfarru de recursos? ¿Ónde ta l’aforru que se quier facer? Y asina, por exemplu, una de les embriólogues que, dende Oregón (USA), firmaron el trabayu sobre l’algame de célules madre clonaes d’un adultu, Nuria Martí, nun facía un añu que la echeren, ERE pel mediu, d’un centru d’investigación de Valencia. ¿El motivu? Que nun hai perres porque los sinvergoñes y delincuentes del gobiernu valencianu gastáronles n’obres faraóniques y en too eso qu’agora tán investigando los xueces. ¿Otru exemplu? Pues al físicu de 30 «añinos» Diego Martínez, consideráu’l Meyor Fisicu Européu Xoven pola Sociedá Europea de Física, negáron-y una beca n’España porque «no tenía capacidad de liderazgo científico». Agora ta trabayando n’Holanda, ellí nun deben valorar eses babayaes.
La conclusión a too esto ye la de siempre: estí país (España), en manes d’incapaces, inorantes o delincuentes, nun tien igua. Nun hai naide que faiga una prelación d’aforros y recortes, pa recortar o quitar lo que ye superfluo, que ye muncho, de sueldos y comisiones regalaes, organismos inesistentes o que nun funcionen, asesores que nun asesoren o fáinlo al revés, gastos militares, una cámara llamada Senáu que tal como ta nun tien sentíu, Diputaciones que dupliquen funciones, evasiones fiscales, economíes somorguiaes, etc. etc. y sofitar con puxu otra riestra d’actividaes importantísimes pal futuru del Estáu. Másime cuando autoridaes na materia, como Joan Guinovart, direutor del Institutu d’Investigación Biomélica dicen que la solución ye barata, que con poques perres podría tenese un modelu: «flexible, ágil y eficaz». El problema ye que nin se sabe, nin se quier. Y asina nos van les coses.
