close
Información o desinformación

Información o desinformación

Teatru XovellanosEsti día, nel espaciu que titulo «Olivando» (por cierto, n’asturianu «Olivar» ye, ente otres aceiciones, «caciplar, metese n’asuntos ayenos» que ye’l sentíu que yo-y doi) falaba, al rodiu del «casu Cienfuegos», de les campañes mediátiques que se ficieron cuando lu echaron y que s’allargaron per unos meses. Paez agora que nun sólo unos meses, sinón qu’entovía lleguen hasta’l nuestru tiempu. Güei trai la prensa asturiana’l fallu del xuiciu entamáu por Cienfuegos escontra’l Teatru Xovellanos. Vamos ver les cabeceres de los dos periódicos principales, La Nueva España y El Comercio.

La Nueva España titula: «Cienfuegos gana el juicio contra el Jovellanos y logra los 14o.ooo euros que pedía. La sociedad municipal demandada, el Teatro Jovellanos, había prescindido de Cienfuegos en 2011 en medio de una gran polémica y de numerosas adhesiones al recién cesado«. ¿Qué atalanta un llector d’intelixencia media, como ye’l mio casu? Que’l Xovellanos echó a Cienfuegos inxustificadamente nel 2011, y agora los xueces dan y la razón al cineasta, declarando despidu improcedente ya indemnizándolu con 140.000 euros.

Titulares d’El Comercio: «Cienfuegos gana el juicio al Teatro Jovellanos y cobrará 107.000 euros. La sentencia da laCarmen Veiga razón al exdirector del FICX que denunció a la exgerente del teatro, Carmen Veiga, por el impago de honorarios y gastos».  ¡Coime, esto ye otra cosa! diz agora l’incautu llector al tener otros datos na mano. Bueno, será que lo de la denuncia escontra Carmen Veiga va nel interior de la noticia. Y asina, busca y rebusca pero nun apaez. Porque na información de La Nueva España esi datu, o seya, escontra quién diba la demanda, nun vien. Pero sí vien que «… José Luis Cienfuegos ha logrado en los tribunales un fallo favorable a su reclamación de unos 140.000 euros en concepto de remuneraciones impagadas y de despido improcedente.»  Eso que diz LNE sería la reclamación que fizo, pero nun ye lo que recueye la sentencia a la que tenemos accesu gracies al diariu El Comercio, onde se diz tasativamente que «… no se la concede (la razón) en lo que él considera un despido improcedente cuando fue relevado en su cargo al llegar Foro al gobierno municipal». Y más alantre repite: «…pero no recibirá la indemnización por daños y perjuicios de 9.999,99 euros que solicitaba por lo que consideraba su despido improcedente como director del certamen». Más claro, l’agua. Toles responsabilidaes de la sentencia y el pagu de la indemnización son por culpa de los anteriores xestores del Teatru Xovellanos, anque agora tengan de facese cargu d’elles los actuales responsables. ¿Dalguién va a asumir dalgo de too esto, facer autocrítica, dimitir de los cargos actuales o pagar del so bolsu les perres…? Nin pensalo: balones fuera que vamos ganando.

Hai otres munches consideraciones que vienen na sentencia, na que ponen pingando a doña Carmen Veiga y a sus collaboradores, los señores Sariego y Raja (una xestión «caótica» llega a decir el xuez) pero abúltame que con esto abasta. Yo sé que La Nueva España caltuvo un contenciosu col señor Álvarez Cascos va tiempu. Y conociendo el «percal», o seya los modos y maneres de Cascos y la so dictatorial manera de ser, toi seguru que la razón yera del periódicu. Pero eso nun-y da «patente de corsu» pa confundir al llector, presentando de forma sesgada les informaciones. Los sos llectores, ente los que me cuento, nun lo merecemos.