Con una edá curiosina -91 años- muerre’l cómicu norteamericanu Jerry Lewis que tuvo una montonera d’almiradores, ente ellos munchos reputaos actores y direutores de Hollywood. Nun voi repasar la so biografía, nin filmografía, pues la prensa diaria y especializada ya la ruxó estos díes abondamente. Reconociendo la so «vis» cómica, a min ye un tipu d’humor que nunca me dio más por él. Xesticulante n’escesu, sobreactuáu, reconozo que fizo películes divertíes munches d’elles dirixíes por él mesmu. Quiciás si tuviere un direutor que lu cortara un poco, que lu centrara nun papel, ensin quita-y la frescura, tuviere fecho películes meyores. Pero, en fin, paez qu’a los americanos-yos gusta esi modelu, y a munchos europeos tamién, pues sinón nun s’esplica l’ésitu de personaxes como Louis de Funes, o Rotwan Atkinson, por poner un par d’exemplos. A min les pelis que más me prestaron d’él fueron les vieyes que compartió con Dean Martin, que facía un poco de contrapuntu de tanto «calatravismu» (de los Hermanos Calatrava). «Loco por Anita», cola esplendorosa Anita Ekberg, podría ser un exemplu d’ello. Separáronse porque Lewis creyó que yera’l meyor de los dos y fízo-y un gran favor a Martin que, depués, fizo un piñu de buenísimes películes, como «Río Bravo» de Hawks, «Como un torrente» de Minelli, o la divertidísima «Bésame, tonto» de Billy Wilder. Lo que sí podemos dicir en favor de Jerry Lewis ye que siempre tuvo inxertu en causes en favor de los enfermos y necesitaos. En fin, descanse en paz el cómicu norteamericanu que tuvo xuníu a una gran parte de la mio mocedá.
Jerry Lewis
