Siempre me prestó’l baloncesto. De chaval, xugando. Y nun yera malu del too pues, con l’equipu del Corazón de María de Xixón quedé Campeón d’Asturies Infantil. Pa que se vea lo que creció la raza, yo xugaba de pivot porque yera de los más altos. Entrenábanos José Antonio Roncero, que’n paz estea, y ente otros compañeros recuerdo a Meana «el güevu», Mieres, Cuqui, «el finado» Fernández, nun sé, otros cuantos. Depués, cuando salí del «cole» y lo dexé (o dexóme ello a mí) prestábame velo como espeutador.
Recuerdo como gran novedá cuando na tele pública, y llueu en Canal Plus, principiaron les retransmisiones de los partidos de la NBA, narraos pol grandiosu Trecet. Y aquellos maraviosos xugadores como Magic Johnson, Larry Bird, Isahia Thomas, etc. Yeren los años de la rivalidá Lakers-Pistons, los chicos malos de Detroit, colos Boston Celtics pol mediu. Veíalos col mio fíu Mauro y yera una gozada. Llueu pasaron pa otres cadenes, punxeron a otros llocutores que lo amaneraron y cuasi dexé de velo, anque siempre lo seguí pola prensa y dalgunos resumes de la tele.
Cuento too esto, qu’igual nun tien munchu sentíu, porque dalgo hai que dicir de la muerte d’un de los grandes d’agora: Kobe Bryant. Mui bon xugador y, según dicen los que lu conocieron, persona. Los que vamos llegando a vieyos tenemos siempre la tendencia de recordar como meyor lo que vimos o vivimos n’époques pasaes. A min pásame muncho. Seguro que nun ye asina, pero asina ye como yo lo valoro. Poro, creo qu’aquellos grandes de la NBA que yo veía, y aquellos equipos cuayaos d’estrelles, yeren meyores que los d’agora. Repito qu’igual nun ye asina. En cualquier casu, llamento muncho’l fallecimientu del estupendu xugador de los Lakers, equipu nel que militó tola so vida, y tamién de les persones que lu acompañaben. La so fía, amiguines del equipu, padres… toos ellos nun yeren conocíos del gran públicu pero pa les sos families ye un desconsuelu igual. Un recuerdu dende equí y que la tierra-yos sea leve.
