Yera francés d’orixe polacu y en realidá llamábase Raymond Kopascewski pero, claro, con ese apellíu nun había quien lu pudiere llamar, asina qu’abreviólu y quedó namás en «Kopa». Llegó al Real Madrid a finales de los años 50, depués d’un pasu trunfal pol Stade de Reims onde yá dexó clara la so categoría. Yera mui piquiñín d’estatura, sobre too pa xugar de delanteru centru, puestu que, naquella dómina, solíen ocupar los grandonos rematadores de cabeza. Pero él suplíalo con una velocidá endiañada y un regate curtiu que dexaba a los defenses tiraos pel suelu. Eso, amestao a una gran intelixencia a la hora de ver el xuegu, fízolu llegar mui xoven a lo más alto de la so carrera.
Pese a que’l puestu nel que meyor se desendolcaba yera’l de delanteru centru, nel Real Madrid desplazáronlu al d’estremu derechu, porque nel centru taba l’indiscutible Di Stefano al que naide podía arrempuña-y el sitiu. Na esquina, Kopa nun rendía tanto como d’ariete, anque coles sos fintes y centros medíos complementaba mui bien aquella delantera. La prueba fue que, un par d’años depués, xugó nel so verdaderu puestu cola seleición francesa nel mundial de Suecia, y fue proclamáu meyor xugador del mundial. La delantera de Francia, Wiesneski-Fontaine-Kopa-Piantoni y Vincent, marcó 15 goles en 4 partidos y namás pudo parala aquella maraviosa seleición brasileña de Garrincha, Didí, Vavá, Pelé, etc. Francia quedó tercera, máxima goleadora del tornéu, Just Fontaine record goleador entovía non superáu con 13 tantos y, Raymond Kopa meyor xugador del campeonatu. Llueu volvió al Real Madrid, y ellí otra vuelta a dexa-y el sitiu a la «saeta rubia», don Alfredo.
Nesi puestu vilu yo xugar n’El Molinón, cuando la tarde del famosu «mataxigantes» en que’l Sporting ganó a los blancos por 3-0. Con un gol de Biempica dende los vestuarios, y otros dos del xenial Sánchez, que por ser de Xixón siempre se-y esixo más qu’a tanta medianía. Aquel día’l prau taba dafechamente embarráu, por mor de la lluvia de los díes anteriores (y d’esi mesmu día que llovió lo que quixo) y Kopa, como’l restu l’equipu, naufragó perdíu ente la repla.
En fin, lleo la noticia de la muerte del «napoleón del fútbol», como lu llamaba la prensa cursi, y viénenme munchos recuerdos d’aquella época. Vamos zarrar el grifu amestando namás que morrió un gran futbolista y, según dicen los que lu trataron, una gran persona. Que la tierra y seya leve.
