Esti ye’l títulu que los editores españoles-y dieron a la novela de Delia Owens d’un títulu que sería, más o menos, «Cuando canten los cangrexos». L’autora, Delia Owens, formóse como zoóloga y etóloga na Universidá de Georgia y permaneció per más de venti años n’África col so maríu exerciendo esa profesión. Col pasu los años tornó al so país y, ya divorciada, publicó la so primer (y que yo sepa, única) novela que fue un gran ésitu de ventes.
La novela cuenta la historia de Kya Clark, una neña que vivió unos pocos años cola familia (padre, madre, hermanos y hermanes) nuna zona pantanosa de Carolina del Norte, pero que col pasu’l tiempu fueron abandonando toos. Un padre borrachu y maltratador y unos fíos que nun teníen futuru y colaron en cata d’una vida meyor, fueron el motivu de que Kya quedare sola y tuviere que buscase la vida aprendiendo de la ñatura y de los animales colos que fue conviviendo. Asina medró, con unes poques persones que pudieron ayudala y el rechazu d’otros munchos que la víen como una moza estraña y selvaxe. Yá de mocina vióse mezclada nun casu d’asesinatu y la segunda parte de la novela trata del xuiciu que vien darréu d’esi fechu abegosu.
Ye una novela curiosa, ecoloxista, cuntada con un gran ciñu pol mundu animal y la madre ñatura. Y ye tamién una historia de superación y de cómo se va forxando una personalidá cuando un se ve refugáu pola xente y tien que se facer fuerte pa sobrevivir. A min interesóme seguir el camín de la protagonista, los sos momentos bonos y malos y l’esfuerciu por meyorar cada vuelta, pese a tolos pilancos qu’atopa na vida. La escritura ye fresca y poética, abundando tamién nos detalles científicos del mundu nel que vive Kya, como correspuende a una autora que ye especialista en zooloxía. Anímovos a la so llectura anque nun tengo la seguridá de que preste a tol mundu.
